Uzbekistan Airways kompaniyasining NU273 reysi bortida 26 aprel kuni o`g`il bola dunyoga keldi. Bu haqda kompaniya Matbuot xizmati xabar bermoqda.
Ma`lum bo`lishicha, tug`ruq Istanbulga yaqinlashganda boshlandi. 1996-yilda tug`ilgan yo`lovchi Sitora A. bortkuzatuvchilarga og`riq boshlanganligini bildirgan. Brigadir vaziyatni baholab, bortdagi yo`lovchilarga murojaat qilib, agar ular orasida shifokorlar bo`lsa yordam berishlarini so`radi. Biroz vaqt o`tgach, yo`lovchi homiladorlikning 28 haftasida o`g`il farzandni dunyoga keltirdi. Xavfsiz qo`nishdan so`ng Istanbul xalqaro aeroportining tibbiyot xodimlari bortga chiqishdi. Ona va yangi tug`ilgan chaqaloq klinikaga yotqizildi, ularning ahvoli barqaror deb baholanmoqda.
"Aviakompaniya jamoasi nomidan kichik yurtdoshimizning ota-onasini farzandi tug`ilgani bilan tabriklaymiz, bortda tug`ruq jarayoniga yordam bergan ekipaj va shifokorlarga o`z minnatdorchiligimizni bildiramiz" deyiladi xabarda.
