Oliy Majlis Qonunchilik palatasining navbatdagi majlisida O`zbekiston Respublikasi Bosh vazirining o`rinbosari A. Ramatovga “Yo`l harakati xavfsizligini ta`minlash sohasiga zamonaviy axborot texnologiyalarini joriy etish borasida amalga oshirilayotgan ishlar holati to`g`risida” Qonunchilik palatasining parlament so`rovini yuborish haqidagi masala ko`rib chiqildi. Bu haqda quyi palata matbuot xizmati xabar bermoqda.
Deputatlarning ta`kidlashicha, yo`l harakati xavfsizligini ta`minlash, fuqarolarning yo`llarda baxtsiz hodisalarga uchrashining oldini olish, yo`llar infratuzilmasini yaxshilash bugun har birimizni o`ylantiradigan, kerak bo`lsa, tashvishlantiradigan masala.
Qonunchilik palatasi Spikeri o`rinbosari, “Milliy tiklanish” DP fraksiyasi rahbari Alisher Qodirov so`z olib, masalaning nihoyatda dolzarbligi, fraksiyada ham qizg`in muhokama qilinganini qayd etdi. U radarlar masalasiga alohida to`xtalib, ularni o`rnatishdan maqsad yo`l harakati xavfsizligini ta`minlashga qaratilishi muhimligi va haydovchilarni jarimaga tortishni maqsad qilib olmasligi kerakligini ta`kidladi.
Haydovchilarga yo`lning qaysi qismida qachon "radar" o`rnatilganini oldindan bilish imkoniyati yaratib berilishi shartligi, ogohlantirish belgilari o`rnatilgan taqdirdagina huquqbuzarga nisbatan ma`muriy bayonnoma rasmiylashtirilishi lozimligi aytib o`tildi.
Radar va fotokamera qaerda joylashganini aniq bilmagan haydovchini ma`muriy javobgarlikka tortish noo`rin ekani qayd etildi. Parlament so`rovida ushbu masalalarga atroflicha javob olgandan so`ng, bu bo`yicha, kerak bo`lsa, tegishli qonunni ishlab chiqish, mavjud huquqiy asosni takomillashtirish zarurati yuzasidan ham fikrlar o`rtaga tashlandi.
Shulardan kelib chiqib, parlament so`rovini Bosh vazir o`rinbosari A.Ramatovga yuborilishi deputatlar tomonidan ma`qul, deb topilib, tegishli qaror qabul qilindi.
