Joriy yil 22-23 sentyabr kunlari Samarqand shahrida "O`zbekistonning Reproduktiv salomatligi: yutuqlar va kelajakka reja" mavzusidagi xalqaro miqyosdagi Ilmiy-amaliy konferensiya bo`lib o`tdi. Bu haqda Respublika ixtisoslashtirilgan akusherlik va ginekologiya ilmiy-amaliy tibbiyot markazi xabar qilmoqda.
Unda O`zbekistonning barcha hududlaridan mutaxassislar, shuningdek, akusherlik sohasidagi etakchi xorijiy olimlar, ginekologlar, perinatologlar, reproduktologlar, 10dan ziyod mamlakatlardan molekulyar-genetik tashxischilar ishtirok etdi. Ular orasida Rossiya, Belarus, Ukraina, Gruziya, Isroil, Italiya, Buyuk Britaniya, Fransiya, Xitoy, Koreya, Qozog`iston va Tojikiston vakillari ham bor.
Taniqli xorijiy ekspertlar qatorida — «D.O.Otta nomli akusherlik, ginekologiya va reproduktologiya ilmiy-amaliy instituti» FGBNU (Byudjet hisobidagi Federal Davlat ilmiy muassasasi) direktori Igor Kogan (RF, Sankt-Peterburg), Belarus Respublikasi Respublika «Ona va bola» ilmiy-amaliy markazi direktori Sergey Vasilev (Belarus), V.A. Almazov nomli NMIS (Milliy tibbiy tadqiqot instituti) akusherlik va ginekologiya kafedrasi mudiri Irina Zazerskaya (Rossiya, Sankt-Peterburg), Bachadon bo`yni raki haqida ogohlantirish Xalqaro uyushma Bosh direktori Filip Devis (Buyuk Britaniya, London), Alfredra instituti bosh shifokori Furne Jan Jak Bobo (Fransiya, Parij), «V.I. Kulakov nomili NMIS (Milliy tibbiy tadqiqot instituti)» FGBU (Byudjet hisobidagi Federal Davlat muassasasi) reproduktiv genetika instituti direktori Dmitriy Trofimov (RF, Moskva) va boshqalar ishtirok etdi.
Forum tashkilotchilari O`zbekiston Respublikasi Sog`liqni saqlash vazirligi, «Respublika ixtisoslashtirilgan akusherlik va ginekologiya ilmiy-amaliy tibbiyot markazi» Davlat muassasasi, Samarqand viloyati perinatal markazi.
Tadbirning ochilish marosimida ishtirokchilarni qutlab O`zbekiston Respublikasi Sog`liqni saqlash vazirligi Onalik va bolalikni muhofaza qilish boshqarmasi boshlig`i Ikrom Amonov so`zga chiqdi. U o`z so`zida sog`lom ona va sog`lom bola millatning gullab-yashnashi garovidir dedi.
«Bu borada tashxislashning yangi texnologiyalari va uslublarini o`zlashtirib va uni tibbiyotga joriy eta turib, yanada kuchaytirish va rivojlantirish, davolash muassasalarini zamon talabiga mos eng yangi tashxislash uskunalari bilan jihozlash, akusherlik va ginekologiya, perinatologiya sohasida ko`rsatiladigan tashxislash xizmati sifatini oshirish zarur», — deb ta`kidladi I.Amonov.
Konferensiyada turli mamlakatlardan tashrif buyurgan soha mutaxassislari mamlakatimiz va xalqaro reproduktiv tibbiyotini, akusherlikni, ginekologiyani, perinatalogiyani muhokama qildi.
Dasturga jami 100ta ma`ruza kiritilgan. Muhokama etilayotgan va bugungi kunda onalik va bolalikni samarali muhofaza etish uchun dolzarb sanalgan mavzular qatoridan jismoniy xastalik paytida homilador ayolni parvarish qilishga zamonaviy yondashuv, akusherlikda og`ir holat va ularni hal etishda fanlarararo kommunikasiyalar, onkologik kasalliklar, reproduktiv tizimdagi kasalliklarni jarrohlik yo`li bilan davolashda innovasiyalar ham o`rin olgan.
Shuningdek, konferensiyada O`zbekiston Respublikasi Respublika akusherlik va ginekologiya markazining V.A. Almazov nomli NMIS (Milliy tibbiy tadqiqot instituti) (Rossiya, Sankt-Peterburg) va «Tojikiston Respublikasi sog`liqni saqlash sohasida diplomdan keyingi ta`lim instituti» Davlat ta`lim muassasasi (Tojikiston, Dushanbe) bilan ikkita bitim imzolanishi amalga oshirildi.
