Buxoro viloyati, Romitan tumani, Marziya MFYda joylashgan innovasion turistik klasteriga press-tur tashkil etildi. Bu haqda Darakchi.uz muxbiri xabar berdi.
Ma`lumki, 27 sentyabrda Butunjahon turizm kuni nishonlanadi. Shuningdek, 16-20 oktyabr kunlari Samarqandda Butunjahon turizm tashkiloti Bosh Assambleyasining yubiley 25-sessiyasiga mezbonlik qiladi. Bu esa tabiiyki yurtimizga kelayotgan turistlar sonining yanada oshishini ta`minlaydi. O`zbekistonda esa xorijlik sayyohlarni o`ziga jalb eta oladigan manzillar talaygina. Xususan, Buxorodagi innovasion turistik klasteri shunday turistik ob`ektlar sirasiga kiradi.
Turistik klaster 2020 yil mart oyida ishga tushirilgan bo`lib, hududi 8 gektarga teng bo`lib, mahalliy va xorijiy sayyohlarga turistik xizmatlar ko`rsatishga mo`ljallangan. Klaster yiliga 24 000 nafar xorijiy sayyoh va 270 000 nafar mahalliy sayyohlarni qabul qilish imkoniyatiga ega.
Klasterda 50 dan ortiq ish o`rni yaratilgan.
Mazkur innovasion turizm klasterida 30 xildan ortiq turistik xizmatlar yo`lga qo`yilgan. Jumladan, Buyuk ipak yo`li chorrahasida joylashgan, tarixni o`zida zamonaviy namoyon qilgan 700 o`rinli “Shotyor Emira” restorani, ochiq havoda dam olish maqsadida 3000 o`rinlik “Karvon Saroy” maydoni, 35000 o`ringa mo`ljallangan “Varaxsho” restorani, 30,0 gektar maydonda agro-eko bog`lar va innovasion issiqxonalar barpo etilgan.
Milliy sport o`yinlari, turli tadbirlar va xalqaro miqyosdagi turli xil konferensiyalar o`tkazish imkoni mavjud.
Xalqaro sport o`yinlari (boks, aralash jang MMA) o`tkazish uchun barcha sharoitlar yaratilgan.
Bugungi kunga qadar mazkur innovasion turistik klasterda viloyat miqyosidagi tadbirlar, Respublika miqyosidagi sport o`yinlari, MDH davlatlari sportchi vakillari orasida 2 marotaba o`tkazilgan MMA (aralash jang) va hozirgi kunda yoshlar uchun munosib o`rin tutgan “Zakovat” intellektual o`yining Respublika bosqichi o`tkazilgani bu maskanning naqadar ahamiyat kasb etayotganining dalilidir.
Turistik klaster bir necha yo`nalishlarda o`z faoliyatini olib bormoqda. Jumladan, eko turizm yo`nalishida: Buxoro vohasining Qizilqum mintaqasida joylashgan ushbu hududda — qum barxanlari va saksovulzorlarning ajoyib manzarasi bag`rida ot va tuyalarda sayohat qilish imkoniyati mavjud. Bundan tashqari, yo`ltanlamas avtotransport vositalarida (djip, kvadrasikl) maxsus trassalar bo`ylab sayohat xizmatlari tashkil etilgan. Cho`l hududida 30 gektar maydonda mevali daraxtlardan iborat bog` yaratilgan va kelgusida tejamkor tomchilab sug`orish tizimining joriy etilishi rejalashtirilgan. Bundan tashqari er ostida qurilgan issiqxonada turistik markaz uchun barcha kerakli poliz mahsulotlari etishtirilmoqda.
Tibbiyot turizmi yo`nalishida —zamonaviy o`tovlar, suv havzasi “plyaj”, kelgusida tashkil etilishi rejalashtirilgan tarixiy-zamonaviy mehmonxona hamda “Spa”- sog`lomlashtirish markazida issiq suv, yod va loy bilan davolash hamda quyosh nurlaridan samarali foydalanish xizmatlari yo`lga qo`yilgan.
Gostronomik turizm – yo`nalishida “Amir” restorani, “Karvon Saroy” maydoni, “Varaxsho” ochiq osmon ostida restoranlari va “Sari degi” deb nomlangan turli tematikaga mo`ljallangan ovqatlanish nuqtalarida turli millatlarga mansub mahalliy va xorijiy sayyohlar uchun restoran xizmatlari tashkil etilgan. Mehmonlar uchun tayyorlanadigan barcha turdagi ovqatlarga kerakli poliz va go`sht mahsulotlari turistik klasterning o`zida etishtiriladi va barchasi ekologik toza hisoblanadi.
Ekstremal turizm yo`nalishida - cho`lda Djiplar va kvadrosikllar yordamida sayr qilish, parashyutdan sakrash, ot va tuya poygalari kabi sayyohlarni qiziqtiruvchi bir qator xizmatlar mavjud.
Arxeologik turizm yo`nalishida- moziyga sayr qilishni istagan mehmonlar uchun XVI asr yodgorligi “Bo`rontepa” tepaligidagi arxeologik izlanishlar natijasida shakllangan shahar qoldiqlari mavjud. Ushbu yodgorlik o`zbek davlatchiligining asoslari yaratilgan qadim Baqtriya davridan toki XVI-XVII asrgacha Ipak yo`lida joylashgan muhim markazlardan biri hisoblangan.
Turistik markazda alohida muzeyi burchagi tashkil etilgan bo`lib, tarixiy yodgorliklar qoldiqlarini o`rganuvchi sayyohlar uchun sharoitlar yaratilgan.
Sport turizmi yo`nalishida- mahalliy va xalqaro miqyosdagi sport musobaqalarini, milliy xalq o`yinlari (boks, kurash, ko`pkari, qo`chqor urishtirish, sakrab tep, arqon tortish ) o`tkazish imkoniyatiga ega maxsus sahna, maydon, tomosha uchun sharoitlar yaratilgan. Hozirgi kunga qadar bir necha marotaba turli milliy xalq sport o`yinlari tashkil etib kelinmoqda.
Ov turizmi yo`nalishida- ov qilish uchun shart-sharoitlar yaratilgan bo`lib, 4.5 gektar maydonda baliq havzasida yil bo`yi sayyohlar baliq ovlab o`zlari o`sha joyning o`zida pishirib tanovul qilish mumkin.
Mice turizmi yo`nalishida- mahalliy va xorijiy miqyosdagi turli konferensiya va festivallar hamda tadbirlar o`tkazish imkoniyati yaratilgan.
Joriy yilda 220 nafar xorijiy sayyoh va 14 200 dan ortiq mahalliy sayyohlar tashrif buyurdi va maskan xizmatlaridan bahramand bo`lishdi.
Kelgusida turistik markaz faoliyatini kengaytirib xorijiy sayyohlarni jalb qilish bo`yicha muntazam ishlar olib borilmoqda. Jumladan, Malayziya va Indoneziya davlatlaridagi turistik korxonalar orqali targ`ibotlar tashkil etilib, ziyorat turizmi yo`nalishida Buxoroga tashrif buyuruvchi sayyohlarga qo`shimcha ko`ngilochar xizmat turlariga jalb etish bo`yicha muzokaralar olib borilmoqda.
