“Antistrumin” dori vositasini ishlab chiqargan korxona faoliyati ustidan tekshiruv boshlandi

SSV huzuridagi “Farmasevtika mahsulotlari xavfsizligi markazi” davlat muassasasining Farmasevtika faoliyatini lisenzsiyalash boshqarmasi tomonidan “Antistrumin” dori vositasini ishlab chiqargan “SAMO” MChJ korxonasida farmasevtik faoliyat bo`yicha tekshiruv ishlari olib borilmoqda. Bu haqda SSVning Farmasevtika mahsulotlari xavfsizligi markazi Matbuot xizmati xabar bermoqda. 

Ma`lum qilinishicha, tekshiruv davomida dori vositalari va farmasevtika faoliyati to`g`risidagi qonunchilik hujjatlariga, jumladan, Zarur ishlab chiqarish amaliyoti, Zarur distribyutorlik amaliyoti, Zarur saqlash amaliyoti davlat standartlariga, dori vositalarini ishlab chiqarish, tayyorlash, saqlash va ulgurji realizasiya qilish doirasida texnik jihatdan tartibga solish sohasidagi hujjatlar talablariga muvofiq bo`lish va korxona tomonidan majburiy rioya qilish shart bo`lgan lisenziya talab va shartlari bo`yicha holatlar o`rganilmoqda.

Shuningdek Markazning akkreditasiyadan o`tgan laboratoriyalari tomonidan “Dori vositalarining xavfsizligi to`g`risidagi umumiy texnik reglament"ga muvofiq, “Antistrumin” dori vositasining xavfsizlik ko`rsatgichlari bo`yicha o`rnatilgan tartibda tahlil jarayonlari ketmoqda.

Shu o`rinda Farmasevtika mahsulotlari xavfsizligi markazi keng jamoatchilikka murojaat qilib, tegishli tashkilotlar tomonidan ushbu dori vositasi bilan bog`liq holat sabablari aniqlanib, ma`lum qilinmaguncha, asoslanmagan xabarlarni tarqatmasliklarini so`rab qoladi, deyiladi xabarda.