O`zbekiston va Nagoya shahri o`rtasida do`stlik aloqalarini rivojlantirish, ikki tomonlama iqtisodiy, madaniy-gumanitar aloqalar ko`lamlarini yanada kengaytirish hamda Aichi prefekturasida istiqomat qilayotgan mamlakatimiz fuqarolarini har tomonlama qo`llab-quvvatlash maqsadida O`zbekistonning Nagoya shahrida Faxriy konsulligi ochildi. Bu haqda "Dunyo" AA muxbiri xabar bermoqda.
O`zbekistonning Tokiodagi diplomatiya vakolatxonasi ma`lumotiga ko`ra, joriy yil 19 sentyabr kuni bo`lib o`tgan yangi Faxriy konsullikning ochilish marosimida O`zbekiston Respublikasining Nagoya shahridagi Faxriy konsuli etib tayinlangan "IM Corporation" kompaniyasi maslahatchisi, "Nagoya-O`zbekiston" do`stlik assosiasiyasi maslahatchisi Xiroyuki Itoga tegishli konsullik patenti tantanali topshirildi.
Marosimda Yaponiya parlamenti, vazirliklari, Aichi prefekturasi, Nagoya shahri ma`muriyati va deputatlari, Yaponiya xalqaro hamkorlik agentligi (JICA), Yaponiya tashqi savdo tashkiloti (JETRO), Nagoya savdo-sanoat palatasi, qator yirik kompaniyalar, universitetlar, jamoatchilik tashkilotlari vakillari, Nagoya shahrida joylashgan diplomatiya korpusi vakillari hamda ushbu hududda yashayotgan vatandoshlarimiz ishtirok etishdi.
Tadbirda so`zga chiqqan Yaponiya tomoni vakillari yangi tashkil etilgan O`zbekistonning Nagoya shahridagi Faxriy konsulligi mamlakatimiz Prezidenti Shavkat Mirziyovning 2019 yil dekabr oyida Nagoya shahriga tashrifining amaliy natijalaridan biri bo`lganini qayd etdilar. Shuningdek, O`zbekistonning Aichi prefekturasi va Nagoya shahri bilan do`stona aloqalarni rivojlanish va ikki tomonlama iqtisodiy, savdo, madaniy, ilmiy-texnikaviy, migrasiya va konsullik aloqalarini chuqurlashtirishga ko`maklashish, xalq diplomatiyasi hamkorligi, fuqarolar o`rtasidagi do`stlik rishtalarini mustahkamlash, Aichi prefekturasida tahsil olayotgan va kompaniyalarda faoliyat olib borayotgan O`zbekiston fuqarolarining huquqlariini himoya qilishda katta o`rin tutishi alohida ta`kidlandi.
Jumladan, Yaponiya parlamenti quyi palatasi Qonunchilik va sud masalalari qo`mitasining raisi Tadaxiko Ito o`zi istiqomat qiladigan shaharda O`zbekistonning Faxriy konsulligi ochilishidan juda mamnunligini ma`lum qildi. U O`zbekiston Prezidentining 2019 yilda Nagoya universitetiga tashrifi va unga ushbu universitetning faxriy doktori unvoni berilishi ikki tomonlama ta`lim, iqtisodiy va madaniy aloqalar rivojining garovi ekanligini qayd etdi.
U Aichi prefekturasida istiqomat qilayotgan 500 nafardan ortiq vatandoshlarimiz va yapon turistlarini O`zbekistonga keng jalb qilish maqsadida Faxriy konsullik bilan birgalikda "Nagoya-Toshkent" havo qatnovlarini tiklash va charter qatnovlarini ishlab chiqishga ehtiyoj katta ekanligini aytdi.
Yaponiya parlamenti quyi palatasi deputati, "Yaponiya-O`zbekiston" parlament ligasi a`zosi, sobiq iqtisodiyot va sanoat vaziri o`rinbosari Yasumasa Nagasaka xududlararo hamkorlik va do`stlik aloqalarini rivojlantirish maqsadida yangi konsullik faoliyatini har tomonlama qo`llab-quvvatlashini hamda O`zbekiston bilan strategik hamkorlikni rivojlantirish uchun Yaponiya parlamenti va hukumati tomonidan yordam ko`rsatishga tayyor ekanligini ma`lum qildi. U Yaponiya parlamenti va hukumatiga O`zbekiston bilan strategik hamkorlikni rivojlantirishni qo`llab-quvvatlashda ko`mak ko`rsatishini ta`kidladi.
Nagoya shahri meri Takashi Kavamura O`zbekiston Prezidenti Shavkat Mirziyoev bilan 2019 yil dekabrdagi uchrashuvini iliq xotiralar ekan, Nagoya-O`zbekiston do`stlik aloqalari faol rivojlanayotganidan, ikki davlat fuqarolari o`rtasidagi do`stlik rishtalari mustahkamlanayotgan hamda qo`shma delegasiyalar, iqtisodiy va madaniy missiyalar, maktab o`quvchilari va san`atkorlar almashuvi yo`lga qo`yilganligidan mamnuniyat izhor etdi. U O`zbekistonning Nagoya shahridagi Faxriy konsulligi bilan hamkorlikda ikki tomonlama hamkorlikni kengaytirishga yo`naltirilgan barcha sa`y-harakatlarni qo`llab-quvvatlashini alohida ta`kidladi.
Eslatma: hozirgi kunlarda O`zbekistonning turli xorijiy mamlakatlarda 40 ga yaqin faxriy konsulliklari faoliyat ko`rsatmoqda.
