Xabaringiz bor, Bobur ko`chasini Islom Karimov nomidagi Toshkent xalqaro aeroporti bilan bog`laydigan hamda «S.Tolipov» ko`chasiga chiqish va tushuvchi yo`l o`tkazgichlar qurilishi loyihasi amalga oshirilmoqda. Ma`lum qilinishicha, ayni dam loyiha doirasida umumiy 1422 tup daraxt ko`chirib o`tkazilishi kerak. Ushbu masalani esa jamoatchilik bilan muhokama qilgan holda amalga oshiriladi.
Ma`lumotlarga qaraganda, mavjud yo`l o`tkazgich sutkasiga 36 000 avtomobil o`tkazish quvvatiga ega bo`lib, amalda soatiga 1500 dona avtomobil harakati uchun hizmat ko`rsatadi. Qurilayotgan yo`l o`tkazgich esa soatiga 6 000 dona avtomobil o`tkaza oladi yani sutkasiga 144 000 dona avtomobil harakati uchun hizmat ko`rsata oladi. Bu esa tirbandlikni oldini oladi hamda havoga chiqadigan chiqindi gazlarini 4 barobargacha kamayishiga olib keladi.
“Umumiy 1422 ta daraxt ko`chiriladi. Shundan asosan “yosh” daraxtlar bo`ladi, orasida “yoshi katta” daraxtlar ham bor, unga ham kafolat beramiz. 50-60 yillik daraxtlar bor, ularni yashab ketish darajasi mavsumga bog`liq. Hozir daraxt ko`chiradigan mavsum hisoblanadi, “sokodvijeniya”si to`xtagan. Unga ko`chiriladigan joyi, holati nasliga bog`liq. Agar agrotexnik qoidalarga rioya etib barcha narsa qilinsa, uni (daraxtlarni) yashab ketishi 90% yuqori. “Yosh” daraxtlar 100% desa bo`ladi”, - deydi “Munomak” daraxt ko`chirish korxona rahbari Farrux Hakimov.
Bundan tashqari ob`ektdan ko`chirilgan daraxtlar avvaldan rejalashtirilgan joylarga olib borib ekilishi va ma`lum davr mobaynida maxsus o`g`itlar bilan parvarish qilinishi ta`kidlandi.
“Ekologiya vazirligi jamoatchilikni fikridan kelib chiqqan holda daraxtlarni ko`chirishga ruxsat berish yo ruxsat bermaslik masalasini hal qiladi. Agar ruxsat bergan taqdirda to`liq ekologik talablar, daraxtni ko`chirish, quritib qo`ymaslik bo`yicha talablarga rioya qilgan holda amalga oshirilyaptimi yo`qmi, shuni nazorat qiladi. Agar shundan qandaydir “chetga chiqish” holatlari bo`lsa qonuniy chora ko`radi. Ya`ni, nazorat qiluvchi organ vazifasini bajaradi.
Shaxsan men ko`chirmaslik tarafdoriman, bu mening fikrim, bu vazirlikning fikri emas. Lekin, ikkinchi tomoni turibdi, bu loyihani amalga oshirish natijasida qanchadir avtomobillarni tirbandligi oldi olinadi va avtomobillar xarakati tezlashadi, bu orqali atmosferaga chiqadigan zaxarli gazlar kamayadi, degan nazariyani bildirishyapti. Bu ham balki ekologiyaga foydadir.
Biz barcha jarayonlarni maksimal kuzatishga xarakat qilamiz va kuzatamiz ham. Talabdan “chetga chiqqan” holda kim bo`lishidan qat`iy nazar biz maksimal jazo chorasini ko`ramiz.
Agarda jamoatchilik qarshi bo`ladigan bo`lsa qurilish ishlari shu turgan holatda to`xtatiladi”, - deydi Ekologiya, atrof-muhitni muhofaza qilish va iqlim o`zgarishi vazirining maslahatchisi Rasul Kusherbaev.
