AQSh Senati Ukrainaga yordam uchun ajratiladigan mablag` miqdorini Oq uy so`ragan 24 milliard dollar o`rniga 6 milliard dollargacha kamaytirishni taklif qildi, deb yozdi New York Times qonun loyihasiga tayanib.
Qonun loyihasiga ko`ra, "Ukrainadagi vaziyatga javob berish uchun" Pentagon orqali 4,5 milliard dollar ajratiladi. Qo`shimcha yordam uchun Davlat departamentidan yana 1,65 milliard dollar keladi.
AQSh hukumatini moliyalashtirish 17 noyabrgacha uzaytirilishi kutilmoqda. NYT xabar berishicha, mamlakatdagi tabiiy ofatlar oqibatlarini bartaraf etish uchun yana 6 milliard dollar ajratish taklif qilinmoqda. Oq uy ushbu maqsadlar uchun 16 milliard dollar so`ragan.
Kongress 30 sentyabrgacha kelasi yil byudjetini yakunlashi yoki hech bo`lmaganda hukumatni moliyalashtirish bo`yicha muvaqqat rezolyusiyani qabul qilishi kerak. Hujjatlar o`z vaqtida qabul qilinmasa, hukumat ishi to`xtatiladi.
Oq uy Milliy xavfsizlik kengashining strategik aloqalar bo`yicha koordinatori Jon Kirbi 26 sentyabr kuni Ukrainaga yana bir necha hafta davomida harbiy ta`minot etkazib berish uchun etarli mablag` bo`lishini aytdi. Qo`shimcha mablag`ning etishmasligi, dedi u, kuz va qishda Ukrainani qo`llab-quvvatlash qobiliyatiga ta`sir qiladi.
