"Qamchiq" dovonidan o`tuvchi xalqaro ahamiyatdagi A-373 avtomobil yo`lining 221-kilometridagi “Ohangaronsoy” ko`prigida ta`mirlash ishlari boshlanganligi munosabati bilan mazkur yo`lning “Toshkent-Vodiy” yo`nalishi vaqtincha yopilib, yo`lning “Vodiy-Toshkent” yo`nalishi beton to`siqlar yordamida ikkiga ajratildi va ushbu tomonda qarama-qarshi yo`nalishlar tashkil etildi. Bu haqda Ichki ishlar vazirligi Jamoat xavfsizligi departamenti Yo`l harakati xavfsizligi xizmati xabar berdi.
Haydovchilarni ogohlantiruvchi va ularga yo`nalishlarni ko`rsatuvchi hamda harakat xavfsizligini ta`minlaydigan tegishli belgilar o`rnatildi.
Shuningdek, tungi vaqtda ham xavfsizlikni ta`minlash maqsadida vaqtincha tashkil etilgan yo`nalishlarga chiroqlar o`rnatilib, yo`nalish ko`rsatuvchi belgilarni ham yoritish choralari ko`rildi.
️Barcha haydovchilardan ko`prik ta`mirlanayotganligi sababli tashkil etilgan chora-tadbirlarni to`g`ri tushunushlarini, mazkur joydan harakatlanib o`tishda tartibga soluvchilarning ishoralariga, yo`l belgilari va chiziqlarining talablariga rioya etgan holda, tezlikni oshirmasdan, ehtiyotkorlik bilan harakatlanishlarini so`raymiz.
