Prezident topshirig`i bilan O`zbekistondagi maktab va bog`chalarda bepul yod preparatlarini tarqatish yo`lga qo`yildi. Xo`sh, bu modda inson organizmi uchun shunchalik foydalimi? Tibbiyot fanlari doktori, professor, RIIAT Endokrinologiya markazi ilmiy ishlar buyicha direktor o`rinbosari Z.Yu.Xalimova shu savolga javob berdi.
— Yod inson organizmi uchun muhim mikroelement hisoblanadi. Avvalambor, yod inson tanasidagi eng muhim endokrin bez-qalqonsimon bezning gormonlar ishlab chiqishidagi asosiy modda hisoblanadi. Qalqonsimon bez gormonlari tanadagi modda almashinuvini boshqaruvchi omil bo`libgina qolmay bolalar va o`smirlarning jismoniy, aqliy va jinsiy rivojlanishida muhim o`rin tutadi. Tireoid gormonlar xomilaning nerv hujayralarining rivojlanishidan boshlab insonning butun hayoti davomida muhim rol o`ynaydi. Yod etishmovchilik natijasida bolalar va o`smirlarlarda aqliy va intellektual etishmovchilikdan kretinizmgacha, jismoniy rivojlanishdan orqada qolishdan pastbuylikkacha, endemik hamda tugunli buqoq, qalqonsimon bez gormonlari etishmovchiligi- gipotireoz kabi chuqur o`zgarishlarga olib keladi.
Odatda yod etishmovchiligi bolalar va o`smirlarda yaqqol tashqi belgilarga ega bo`lmasada, ko`pincha holsizlik, tez charchash, bosh og`rig`i, ishtaha pasayishi, kayfiyatning o`zgaruvchanligi, qiziqishlarini pasayishi bilan kechadi. Bolalar va o`smirlarda o`qish qobiliyati pasayadi, aqliy topshiriqlarni qiyinlik bilan bajarishadi, xotirasi susayib, uyquchanlik paydo bo`ladi
Bu belgilar yod tanqislik holatlarining ilk belgilaridir. Agarda yod tanqislik holati o`z vaqtida hal etilmasa bunday bolalarda kelajakda tiklab bo`lmaydigan - intellektual, jismoniy, jinsiy, ruhiy asoratlar rivojlanadi.
Shuning uchun og`ir yod tanqislik holati o`rin tutgan O`zbekistonimizda xalkimiz kelajagi yulida biz bugun qayg`urib, farzandlarimizni bu og`ir asoratlardan asrashimiz va uni oldini olishimiz zarur. Ya`ni bolalar va o`smirlar muntazam ravishda yod saqlovchi dori vositalari bilan uzoq vaqt davomida ta`minlanishi zarur!!!
