Germaniya sudi Myunxendagi muzeyda bir nechta rasmni soxtasiga almashtirgan va asil nusxalarini auksionda sotgan muzey xodimiga hukm o`qidi. 30 yoshli erkak bir yilu 9 oy muddatga qamoq jazosiga hukm qilindi. Shuningdek, u 60 ming evrodan ortiq tovon puli to`lashi kerak, deya yozmoqda Zamon.uz.
Xodim muzeydagi eksponatlar saqlanadigan joyga kirish huquqiga ega bo`lgan. U Frans fon Stukning “Qirol qurbaqa haqidagi ertak” kartinasini osongina soxta suratga almashtirdi. Shundan so`ng rasmni katta bobosiga tegishli deb ko`rsatib, asil nusxasini kimoshdi savdosiga qo`ydi va Shveytsariyadagi galereyaga 70 ming evroga sotdi.
Shuningdek, u muzey omboridan “Sharob tatib ko`rish” va “Tog`larda o`tin terib yurgan ikki qiz” asarlarini o`g`irlagan. Ular uchun jinoyatchi taxminan 12 ming evro olgan.
Bu ishni muzey baholovchisi payqadi, u rasmlardan biri to`g`ri o`lchamda emasligini aniqladi. Muzeyda soxta narsa borligi ma`lum bo`lgach, mutaxassislar boshqa asarlarni tekshirgan.
Muzey xodimi olgan 60 617 evroni qarzlarini to`lash va dabdabali hayot kechirish uchun sarflagan. U o`ziga yangi kvartira, qo`l soati va hashamatli Britaniya mashinasini sotib olgan.
