Axborot kommunikasiya texnologiyalari — bugungi kunning eng serdaromad sohalaridan biri. O`zbekistonda ushbu sohadagi o`rtacha oylik maosh miqdori — 4 ming dollar atrofida, dunyo bozorida esa 100-150 ming dollar atrofida baholanadi.
Bu — yoshlar AKTni o`rganishi uchun eng katta motivasiya. O`z navbatida, davlat ham yoshlarning ushbu zamonaviy kasbni mukammal egallashidan manfaatdor — dunyoning eng ilg`or kashfiyot va ishlanmalari aynan axborot texnologiyalari sohasida yaratilmoqda. Shu bois sohani o`rganmoqchi bo`lgan yoshlar davlat tomonidan to`liq qo`llab-quvvatlanyapti.
Kompyuter xarid qilish uchun kafillik
“Bir million dasturchi” loyihasi doirasida o`quv kurslarini muvaffaqiyatli tamomlagan yoshlarga, shuningdek, IT-park rezidentining o`quvchisi yoki bitiruvchisi bo`lgan yoshlarga iste`mol krediti orqali kompyuter xarid qilish uchun kafillik berish hamda mazkur kreditlarning foiz to`lovlarini Yoshlar ishlari agentligi tomonidan kompensasiya qilish yo`lga qo`yildi.
Bu — o`z kompyuteriga ega bo`lish istagidagi yoshlar uchun muhim imkoniyat. Ayniqsa, hududlarda qiziquvchan, bilimli yoshlar ko`p, iste`mol kreditlari foizi ular uchun qimmatlik qilishi yoki to`lov qobiliyatidan shubhalangan banklar rad javobini berishi mumkin. Shunday paytda Yoshlar ittifoqining kafilligi hamda foizlarini qoplab berishi asqotadi. Ushbu loyiha doirasida o`quv kurslarini muvaffaqiyatli tugatgan 165 ming nafardan ortiq yoshlar ariza topshirgan va shundan 48 ming nafar yoshlarga kompyuter xaridlari uchun 357,5 milliard so`m iste`mol kreditlari ajratildi va ularning foiz to`lovlari uchun 35,2 milliard so`m yo`naltirildi.
“Bir million dasturchi”
Bugungi kunda “Bir million dasturchi” loyihasi doirasida ta`lim olayotganlar soni 2 million 503 ming nafar (2023 yil boshidan 480 ming nafar)dan oshdi. Shuningdek, 1 million 175 ming 933 nafari bitiruvchi sertifikatini qo`lga kirit, shundan, 646 ming 763 nafari (55%) erkaklar, 529 ming 170 nafari (45%) ayollar.
Dasturchi bo`lmoqchi bo`lgan yoshlar uchun yana bir imkoniyat yaratilgan — 2022-2024 yillar davomida “Astrum” IT akademiyasida o`quv kurslarida tahsil olish uchun 4 000 nafar yoshga Aloqa bank tomonidan BHMning 75 baravaridan oshmagan 3 yilgacha (6 oy imtiyozli muddati bilan) ta`lim krediti ajratish hamda mazkur kreditlarning foiz to`lovlarini Yoshlar ishlari agentligi tomonidan kompensasiya qilish yo`lga qo`yildi.
AKT sohasining rivojlanishi mamlakatning iqtisodiy o`sishi va raqobatbardoshligini oshirilishiga katta hissa ko`shadi. Ushbu yo`nalishda yoshlarni qo`llab-quvvatlash innovasiyalarni ishlab chiqish, yangi ish o`rinlari yaratish va xorijiy sarmoyalarni jalb etishga xizmat qiladi. Davlat dasturchilikka qiziqqan, IT sohasini o`rganmoqchi bo`lgan yoshlarni qo`llab-quvvatlayotgani — kelajak uchun sarmoya. Bu yoshlar o`zlariga sarflanayotgan mablag`larni ortig`i bilan oqlashadi. Texnologiyalarni o`rgangan yoshlar davlat innovasion rivojlanishiga o`zining munosib hissasini qo`shadi.
