Ijtimoiy tarmoqlarda fuqaro kasalxonada erkak shifokorning rad javobi tufayli unga temir stul uloqtirgani aks etgan video tarqaldi.
Bosh prokuratura mazkur videoxabarda ko`rsatilgan shaxs prokuratura organlarida xizmat qilmasligini ma`lum qildi.
Shaxs oliy ta`lim muassasasi talabasi ekanligi aniqlandi.
"Oliy ta`lim muassasasi manfaatlariga zarar etkazmaslik maqsadida boshqa ma`lumotlar oshkor qilinmaydi" deyilgan xabarda.
Ushbu voqea Toshkent shahar 7-son klinik shifoxonasida sodir bo`lgani aytilmoqda.
Tibbiyot muassasasida shifokor va fuqarolarning bir-birlari bilan janjallashayotgan holati aks etgan videotasvir yuzasidan Toshkent shahar Sog`liqni saqlash bosh boshqarmasi batafsil ma`lumot berdi.
"Dastlabki holat bo`yicha bugungi kunda 7-son shahar klinik shifoxonasida aholiga qulaylik yaratish va kechiktirib bo`lmaydigan holatlarda shoshilinch tibbiy yordam ko`rsatish maqsadida qator chora-tadbirlar amalga oshirilmoqda.
Xususan, tibbiyot muassasasi qabulxonasi qoshida zamonaviy diagnostik uskunalar bilan jihozlangan “Emergency room” maxsus xonalari tashkil qilinib, ularda bemorlarga zarur tibbiy yordam ko`rsatilmoqda.
Bugungi kunda mazkur shifoxonaga bir sutkada 300 nafarga yaqin fuqaro tibbiy yordam ko`rsatish, ko`rikdan o`tish va tibbiy maslahat olish uchun murojaat etadi.
Ularga malakali tibbiyot xodimlari tomonidan o`rnatilgan standartlarga muvofiq tibbiy ko`rikdan o`tkazish, diagnostika ishlarini olib borish, ambulator va stasionar tartibda tibbiy yordam ko`rsatish, professional tibbiy maslahat berish, reabilitasiya qilish va davolashga qaratilgan boshqa xizmatlar ko`rsatilmoqda.
Ushbu tibbiy xizmatlarning barchasi bepul va tunu kun davomida o`rnatilgan standartlar va sifat darajasiga mos tarzda amalga oshiriladi. Shu boisdan ijtimoiy tarmoqlarda tarqalgan xabarlar asossiz.
Shuningdek, shifokor va fuqarolarning bir-birlari bilan janjallashayotgani aks etgan videotasvirdagi holat ham mazkur shifoxonada joriy yil 6 noyabrda sodir bo`lgan.
Aniqlanishicha,shu kuni soat chamasi 16:00 lar atrofida 2001 yilda tug`ilgan fuqaro S.A. qabulxonaning yuz-jag` jarrohligi xonasiga yutinishdagi og`riqlar, chaynashning qiyinligi, ikkala tomon jag` osti sohasidagi shish va tana haroratining ko`tarilishi shikoyatlari bilan murojaat qilgan. Bu paytda shifokor D. Muhitdinova navbatchilikda bo`lgan.
Fuqaro shifokor tomonidan ko`rilganda burun-halqum va bodomsimon bezlar giperemiyalashishi kattalashgani, giperemiya butun og`iz bo`shlig`i shilliq qavatiga tarqalgani, ikki tomonlama jag` osti va bo`yin limfa tugunlari simmetrik kattalashgani hamda tana harorati 37,5 darajadan yuqori ekanligi aniqlangan.
Shunga ko`ra, shifokor tomonidan bemor virus etiologiyali rinofaringit yoki infeksion mononukleozga gumon qilinib, virusolog-mutaxassis ko`rigiga yuborilgan. Bundan esa u va yaqinlari norozi bo`lib, shifokorga o`ta qo`pol munosabatda bo`lgan va unga qarata stul otgan" deyiladi xabarda.
Ayni paytda mazkur holat yuzasidan ichki ishlar organlari tomonidan surishtiruv ishlari olib borilmoqda. Uning natijalari yuzasidan batafsil ma`lumot beriladi.