Sal avval, Sergeli tumanida Milliy gvardiya xodimi va fuqaro o`rtasidagi janjal aks etgan video tarqalgan va fuqaroga qonuniy chora ko`rish uchun uni qidirib topish choralari ko`rilayotgani xabar qilingan edi.
Ayni paytda Milliy gvardiya matbuot xizmatining xabar qilishicha, tezkor-qidiruv tadbirlari natijasida mazkur holatni sodir etgan shaxs 1981 yilda tug`ilgan, Shayxontohur tumanida doimiy yashaydigan, muqaddam Jinoyat kodeksining 276-moddasi bilan sudlangan, oilali, muayyan bir mehnat faoliyati bilan shug`ullanmaydigan fuqaro S.J. ekanligi aniqlanib, qo`lga olingan.
Aniqlanishicha, fuqaro S.J. 2023 yilning 12 noyabr kuni Sergeli tumani, Yangi Sergeli ko`chasida joylashgan ovqatlanish shahobchasi oldida qo`lidagi chiqindilarni shu erda o`rnatilgan maxsus chiqindi qutisiga tashlamay, piyodalar yo`lagiga qasddan tashlagan.
Mazkur holatni ko`rib qolgan Milliy gvardiya harbiy xizmatchisi huquqbuzarlikni bartaraf etish maqsadida S.J. ga belgilanmagan joyga tashlangan chiqindilarni maxsus chiqindi qutisiga tashlash talabini qo`yganida, fuqaro talablarni bajarishdan bosh tortib, xizmat vazifasini bajarayotgan harbiy xizmatchiga faol qarshilik ko`rsatib, uni omma oldida obro`sizlantirganligi va haqorat qilganligi uchun uning xatti-harakatlari yuzasidan qonuniy baho berish maqsadida to`plangan hujjatlar Sergeli tuman prokuraturasiga yuborildi. Unga nisbatan O`zbekiston Respublikasi Jinoyat kodeksining 219-moddasi bilan jinoyat ishi qo`zg`atildi.
Hozirda mazkur holat yuzasidan dastlabki tergov harakatlari olib borilmoqda