O`zbekiston 2024 yil sayohat qilishga arziydigan mamlakatlar qatoriga kiritildi.
Hindistonning nufuzli telekanallaridan biri – “NDTV” xorijiy sayyohlarni 2024 yilda O`zbekistonga tashrif buyurishga chaqirdi.
Telekanalning rasmiy saytida e`lon qilingan maqolada joriy yil ko`ngildagidek sayohat yo`nalishlarini izlayotganlarga madaniy boylik, tabiiy go`zallik va noyob taassurotlarni jamlagan mamlakatlarni tanlash maqsadga muvofiq ekanligi tavsiya etilgan.
Muallif mazkur yo`nalishlar sirasiga Buyuk ipak yo`li merosiga boy O`zbekistonni kiritib, yurtimizga kelib, tarix sahifalariga sayohat qilish zarurligini yozgan.
– Samarqand, Buxoro va Xiva kabi qadimiy shaharlarni kashf eting. Ushbu maskanlardagi betakror me`morchilik namunalari va gavjum bozorlar bir paytlar karvonlar orqali savdo-sotiq qilingan davrlarni eslatadi, – deyiladi “NDTV” saytida.
Maqolada, shuningdek, mamlakatimizda qad rostlab turgan me`moriy mo``jizalar odamlarni hayratga solishi ta`kidlangan.
