Prezidentimiz Shavkat Mirziyoev joriy yil fevral oyida o`tkazgan yig`ilishda nogironligi bo`lgan shaxslarni qo`llab-quvvatlash masalasiga e`tibor qaratdi. Bu haqda UzA xabar berdi.
O`zbekiston 2021 yilda Nogironligi bo`lgan shaxslar huquqlari to`g`risidagi konvensiyaga qo`shilgani tarixiy voqea bo`lgani va undagi majburiyatlarni bajarish bo`yicha tizimli ishlar amalga oshirilayotgani qayd etildi.
Davlatimiz rahbari viloyat va tuman hokimlari ushbu shaxslarga yordam berish, ularning uyushmalari va tashkilotlari bilan muloqot qilish, sharoit yaratish bilan etarlicha shug`ullanamayotgani, ayrim vazirlik, idoralar va viloyat hokimliklarda nogironligi bo`lgan birorta odam ishga olinmagani tanqid qildi.
Yig`ilishda qo`yilgan masalalar ijrosi bo`yicha ayni paytda nogironligi bo`lgan shaxslarni ish bilan ta`minlash maqsadida ularga mos ish o`rinlari o`rganib chiqilgan.
Prezident huzuridagi Davlat xizmatini rivojlantirish agentligi axborot xizmatidan ma`lum qilishlaricha, nogironligi bo`lgan shaxslarga mo`ljallangan vakant lavozimlar uchun ochiq tanlov e`lon qilindi.
Ijtimoiy himoya milliy agentligi, vazirlik va idoralar hamda korxona, tashkilotlar bilan hamkorlikda tashkil etilayotgan tanlovga oid ma`lumot agentlikning vakant lavozimlarga oid ochiq portaliga joylashtirildi.
Vakant lavozimga ariza yuborish uchun vacancy.argos.uz portaliga kirish, keyin "Kabinetga kirish" tugmasini bosish talab etiladi.
Keyingi qadamda OneID tizimidan ro`yxatdan o`tish kerak. Bu tizimdan ro`yxatdan o`tganlar esa login va paroli orqali shaxsiy kabinetiga kiradi.
Shundan so`ng asosiy sahifaga o`tib, "Vakansiya izlash" tugmasini bosish va "Nogironligi bo`lgan shaxslar uchun" bo`limiga o`tish zarur. Keyin vakant ish o`rnini tanlash hamda malaka talablari bilan tanishgandan so`ng "Ariza yuborish" tugmasini bosish lozim.
Ariza holatini "Mening arizalarim" bo`limida kuzatib borish mumkin.
Nogironligi bo`lgan shaxslarga mo`ljallangan vakant lavozimlar uchun ochiq tanlovlar soddalashtirilgan tartibda tashkil etiladi.
Bunda, tanlovning barcha bosqichlari ish beruvchi tashkilot tomonidan tashkil etiladi. Ushbu vakant lavozimlar uchun tanlovlarda test sinovi o`tkazilmaydi.
