O`zbekistonda xizmat ko`rsatgan artist Gulchehra Sa`dullaeva insultni bo`ldi. Bu haqda uning qizi, aktrisa Muqaddas Sa`dullaeva Instagram sahifasi orqali xabar qildi.
“Ikki kun oldin yuragim yorilishiga ozgina qoldi. Soat 12:20 larda opam yig`lab qo`ng`iroq qildilar. “Tinchlikmi?”, desam onamning mazalari qochgani, insult alomati borligini, tezda ota hovlimizga kelishimni aytdilar. Tezda etib bordim. Qarasam onam yaxshi gapirolmayaptilar, chap taraflari yaxshi ishlamayapti. Tez yordam etib keldi, onamni zudlik bilan shifoxonaning jonlantirish bo`limiga olib ketishdi. Tez yordam mashinasida opam bilan birgalikda onajonimning oldilarida ketdik. Onajonim tinmay tillari aylanib-aylanmay “Men umraga borishim kerak, Makkaga borishim kerak, boraman-a, bolam?”, deb zo`rg`a gapirdilar. Har safar gapirishga harakat qilganlarida lablarini chap tarafi qayrilib ichiga buralib so`zlar tillaridan yaxshi chiqmay qolardi. 5 may kuni umra safariga bormoqchi edik. Endi safarni qoldirdik. Insult to`satdan bo`lgan, kechasi tushlarida dadajonimni ko`ribdilar. Dadajonim uch dasta gul bilan onamning oldilariga kelibdilar. Shu tushlarini opamga telefonda so`zlab berayotganlarida to`satdan gaplarini oxiriga etkaza olmay tillari aylanmay, chap taraflari harakatdan qolibdi, — deb yozdi Muqaddas Sa`dullaeva.
