BDKI Toshkent filiali Vasiylik kengashining anjumani bo`lib o`tdi

Renessans kino uyida Butunrossiya davlat kinematografiya instituti Toshkent filiali Vasiylik kengashi yig`ilishi o`tkazildi. Unda Kinematografiya agentligi direktori Firdavs Abduxoliqov, agentlik direktori o`rinbosari Alisher Xadjaev, Kambag`allikni qisqartirish va bandlik vaziri o`rinbosari Ra`no Turdiboeva, BDKI Toshkent filiali direktori va prorektorlari, ta`limni muvofiqlashtirish bo`limi vakillari qatnashdi.

Anjumanda BDKI rahbariyatidan rektor Vladimir Malishev, prorektor Igor Korotkov, institut dekanlari Elena Magar, Liliya Lanina, shuningdek, O`zbekiston Respublikasi Madaniyat vazirining birinchi o`rinbosari Avazxon Tojixonov, Innovasion rivojlanish agentligi direktori Sharof Rajabboev, Oliy ta`lim, fan va innovasiyalar vaziri o`rinbosari Shohrux Daliev, Maktabgacha va maktab ta`limi vaziri birinchi o`rinbosari Usmon Sharifxo`jaev, Toshkent shahar hokimi o`rinbosari Davrukov Faxriddin, Turizm qo`mitasi va Kasaba uyushmalari federasiyasi vakillari Zoom platformasi orqali ishtirok etdi.

Tadbirda filial faoliyati hamda 2024–2025 o`quv yiliga mo`ljallangan dastur ko`rib chiqildi. Shu bilan birga, o`quv yili bo`yicha qabul rejasi tahlil qilinib, Kinematografiya agentligi tomonidan takliflar berildi.

Kengash davomida milliy kinematografiya darg`alari Ali Hamroev, Elyor Ishmuhammedov, Odelsho Agishev va Rustam Sa`dullaevlar so`zga chiqib, yosh ijodkorlarga katta umid bildirib, kelgusidagi faoliyatlariga muvaffaqiyat tiladi.

Shuningdek, videokonferens-aloqa ko`rinishidagi tadbirda BDKI rektori Vladimir Malishev so`zga chiqib, kun tartibidagi masalalar yuzasidan fikr bildirdi, shuningdek, institut va talabalar faoliyatiga omad tiladi. Studentlar ham mamnuniyat bilan o`zbek kinematografiyasiga sifatli filmlar taqdim etishlarini ta`kidlashdi.

Tadbir yakunida Badiiy kengash tomonidan o`tkazilgan pitchingda g`olib deb topilgan 9 ta loyiha mualliflari, BDKI talabalariga sertifikatlar topshirildi.