MIB xodimlari 18 yoshida urushga otlangan 100 yoshli otaxonni ziyorat etishdi. Bu haqda MIB axborot xizmati darakchi.uz’ga xabar berdi. Bayram arafasida Majburiy ijro byurosi Toshkent shahar boshqarmasi hamda Olmazor tuman bo`limi xodimlari bilan birgalikda shu yil 100 yoshni qarshilagan Abbos ota Apponovningxonadoniga yo`qlab borildi.
Abbos otaning farzandlari, nabiralari uchun an`anaga aylangan bu sana oldi tayyorgarlik ko`rilishi sezildi.Albatta, qarisi bor uyning parisi bor deydilar. Biz ham Abbos otadan duolar olib keyin urush yillarini xotirlab berishlarini so`radik. Abbos ota 18 yoshida Vatan uchun, tinchlik uchun urushga otlanganini, o`sha kunlarda o`tkazgan umrini so`zlab berdi. Ota yurtimiz tinchligi, farovonligini niyat qilib duo qilarkan, yoshlarga yurt uchun har doim fidokorona xizmat qilishini, shu yurt uchun jon fido qilgan bobolar ruhi shod bo`lishini, ularga munosib avlod bo`lishini tiladi.
Ota 4 yil xizmatidan so`ng, O`zbekistonga Toshkentga qaytib, o`zining sevgan kasbi o`qituvchi bo`lib, maktabda yoshlarga ta`lim berib keldi. Nafaqaga chiqqanidan so`ng ham shogirdlar ardog`ida bo`lib, o`z tajribalarini yoshlarga o`rgatib keldi. Abbos otaga uzoq umr, sihat-salomatlik tiladik, yana bayramlarda yo`qlab borishimiz nasib etsin.