Raqobatni rivojlantirish va iste’molchilar huquqlarini himoya qilish qo‘mitasi Qoraqalpog‘istondagi 7 ta tuman hokimliklari hujjatlarida raqobat qonunchiligi talablariga zid holatlarni aniqladi.
Ma’lum qilinishicha, Qoraqalpog‘iston Raqobat qo‘mitasi tomonidan 2024 yilning birinchi yarim yilligi davomida 11 ta tuman hokimliklarida “Raqobat to‘g‘risida”gi qonun talablari yuzasidan jami 15 mingdan ortiq normativ-huquqiy va boshqa turdagi hujjatlar yuzasidan o‘rganishlar olib borildi.
Mazkur o‘rganishlar jarayonida, Amudaryo, Chimboy, Kegayli, Taxtako‘pir, Qorao‘zak, Taxiatosh va Xo‘jayli tuman hokimliklarida 31 ta holatda tovar yoki moliya bozorida faoliyat ko‘rsatayotgan boshqa xo‘jalik yurituvchi subyektlarga nisbatan afzal holatga qo‘yadigan imtiyozlar, preferensiyalar, yengilliklar va eksklyuziv huquqlarni asossiz ravishda berish, shartnomalar tuzishda ustunlik berish, sotib oluvchilarning muayyan doirasiga tovarlarni birinchi navbatda realizatsiya qilish va raqobatni cheklashga hamda iste’molchilarning huquqlari va qonuniy manfaatlarining kamsitilishiga olib keluvchi boshqa turdagi hujjatlar chiqarilgani aniqlandi.
Buning natijasida “Raqobat to‘g‘risida”gi qonunning 22-moddasi birinchi qismining 4, 5, 7, 9, 12 va 13-xat boshlari talablari buzilishiga yo‘l qo‘yilgan.
Yuqoridagi o‘rganish natijalariga ko‘ra, 7 ta tuman hokimliklarining bayonnoma va chiqish xatlari “Raqobat to‘g‘risida”gi qonun talablariga muvofiqlashtirildi hamda qonun buzilish holatlarini bartaraf etish va kelgusida bunday holatga yo‘l qo‘ymaslik yuzasidan taqdimnomalar kiritildi.
