Buxoroda noqonuniy baliq ovlagan fuqarolarga sud tomonidan yakuniy jazo tayinlandi. Bu haqda Ekologiya vazirligi xabar berdi.
2023 yil 16 dekabr kuni "Og‘itma" ko‘lidan 4 nafar fuqaro Qizil kitobga kiritilgan 12 dona Turkiston mo‘ylovdori, 7 dona tovonbaliq, 17 dona zog‘ora hamda 1 dona moybaliqni taqiqlangan usulda, ya’ni to‘r yordamida ovlaganligi aniqlangan. Natijada tabiatga 292 million 162 ming so‘m zarar yetkazilgan va hujjatlar sudga taqdim etilgan.
Qayd etilishicha, holat yuzasidan 3 nafar huquqbuzarga nisbatan Jinoyat kodeksi 202-moddasi 3-qismi bilan 4 yil 6 oy muddatga ozodlikni cheklash jazosi tayinlandi.
Shuningdek, yana bir huquqbuzarga nisbatan T.R.ga Jinoyat kodeksi 202-moddasi 3-qismining “g", "e", "j” bandlari bilan Jinoyat kodeksning 57-moddasi qo‘llanib, 2 yil muddatga ozodlikdan mahrum qilindi.
