Avgust oyining oxirgi kunlarida va 1—3 sentyabr bayram kunlarida O‘zbekiston hududi bo‘yicha quruq va kam bulutli ob-havo bo‘lishi kutilmoqda. Bu haqda “O‘zgidromet” xabar berdi.
Ma’lum qilinishicha, havo harorati 30—31 avgustda kunduz kunlari 31-35 daraja atrofida, janubda 37 darajagacha bo‘ladi. 1 sentyabrdan respublika hududi bo‘yicha harorat foni asta-sekin pasayadi va 2—3 sentyabrda harorat 28-31 daraja atrofida bo‘ladi. Harorat kechalari 13-15 darajagacha pasayadi.
Nisbatan salqin havoning kirib kelishi ba’zi joylarda shamol tezligi 15-20 metr/sekundgacha kuchayishi, ayrim joylarda chang-to‘zon bilan qayd etiladi.
Toshkentda 30—31 avgust va 1—3 sentyabr kunlari havo asosan ochiq bo‘ladi. Shamol 3-8 metr/sekund tezlikda esadi, 1—2 sentyabrda 10-14 metr/sekundgacha kuchayishi mumkin.
Harorat asosan kechalari 15-18 daraja, 3 sentyabrda 13-15 daraja, kunduz kunlari 30—31 avgust va 1 sentyabrda 30-34 daraja, 2—3 sentyabrda 28-30 daraja bo‘ladi.
