Korrupsiyaga qarshi kurashish agentligi tomonidan Samarqand viloyatining barcha tuman va shaharlarida ochiq ma’lumotlarni e’lon qilib borilishi tahlil qilindi. Bu haqida agentlik Matbuot xizmati xabar bermoqda.
Jomboy va Pastdarg‘om tumani hamda Samarqand shahar hokimliklarining bu boradagi faoliyati joyiga chiqqan holda o‘rganilgan.
Ochiq ma’lumotlar sifatida joylashtirilishi kerak bo‘lgan ro‘yxatga asosan tuman hokimliklariga 12 turdagi ma’lumotlarni davriy ravishda ochiq e’lon qilib borish majburiyati yuklatilgan.
O‘rganish natijalariga ko‘ra, yuqorida qayd etilgan 3 ta hokimlik tomonidan e’lon qilinishi lozim bo‘lgan 36 ta majburiyatning birortasi bajarilmaganligi, belgilangan ma’lumotlar ochiqlanmagani aniqlandi.
Yuqoridagilarga ko‘ra, o‘rganish o‘tkazilgan hokimliklar bo‘yicha kamchiliklarni bartaraf qilish va qonunbuzilishlarini sodir etgan mas’ul xodimlarni javobgarlikka tortish masalasini ko‘rib chiqish yuzasidan 2 ta taqdimnoma kiritildi va 1 nafar mansabdor shaxs ma’muriy javobgarlikka tortildi.
O‘rganish davrida Jomboy tumani hamda Samarqand shahar hokimliklari faoliyatida aniqlangan kamchiliklar bartaraf etilishi ta’minlandi.
Shuningdek, Kattaqo‘rg‘on shahri, Oqdaryo, Samarqand, Tayloq, Qo‘shrabot tuman hokimliklarining rasmiy veb-saytlari ishchi holatda emasligi, Urgut tuman hokimligi tomonidan faqatgina 3 turdagi ma’lumotlar ochiqlanganligi, Bulung‘ur, Ishtixon, Nurobod, Payariq, Paxtachi tuman hokimliklari tomonidan ochiq ma’lumotlar umuman joylashtirilmaganligi ma’lum bo‘ldi.
Narpay tuman hokimligi saytida umuman ochiq ma’lumotlar sahifasi tashkil etilmagan.
Ochiqlikni ta’minlash sohasida yo‘l qo‘yilgan kamchiliklarni bartaraf etish to‘g‘risida viloyat hokimligiga taqdimnoma kiritilgan.
