22 sentyabrdan boshlab Tojikistonda elektr energiyasini yetkazib berishda cheklovlar joriy etildi. Bu haqida "Aziya-Plyus" xabar bermoqda.
Ta’kidlanishicha, o‘tgan qish kam yog‘ingarchilik bo‘lgan va Vaxsh daryosi hududlarida suv ta’minoti juda past darajada bo‘lgan.
“Yildan-yilga aholi va mamlakatning ijtimoiy-iqtisodiy sohasining elektr energiyasiga bo‘lgan talabining o‘sishi mavsumiy elektr energiyasi tanqisligini keltirib chiqarmoqda. Shu munosabat bilan tarmoq mutaxassislari bu yil ham elektr energiyasining mavsumiy tanqisligi 1 milliard kilovatt soatdan ortiq bo‘lishini prognoz qilmoqda”, — deyiladi “Barki tochik” ochiq aksiyadorlik jamiyatining mamlakat aholisi murojaatida.
Qishloq aholisi 21 sentyabrdan boshlab ertalab soat 5 dan 8 gacha va kechqurun 17 dan 22 gacha, jami kuniga 8-10 soat elektr energiyasi bilan ta’minlanmoqda.
“Barki tochik” avvalroq elektr energiyasi ta’minotidagi uzilishlar tarmoqning ortiqcha yuklamalarga umumiy zaifligi bilan bog‘liq ekanini ma’lum qilgan.
