22 сентябрдан бошлаб Тожикистонда электр энергиясини етказиб беришда чекловлар жорий этилди. Бу ҳақида "Азия-Плюс" хабар бермоқда.
Таъкидланишича, ўтган қиш кам ёғингарчилик бўлган ва Вахш дарёси ҳудудларида сув таъминоти жуда паст даражада бўлган.
“Йилдан-йилга аҳоли ва мамлакатнинг ижтимоий-иқтисодий соҳасининг электр энергиясига бўлган талабининг ўсиши мавсумий электр энергияси танқислигини келтириб чиқармоқда. Шу муносабат билан тармоқ мутахассислари бу йил ҳам электр энергиясининг мавсумий танқислиги 1 миллиард киловатт соатдан ортиқ бўлишини прогноз қилмоқда”, — дейилади “Барки точик” очиқ акциядорлик жамиятининг мамлакат аҳолиси мурожаатида.
Қишлоқ аҳолиси 21 сентябрдан бошлаб эрталаб соат 5 дан 8 гача ва кечқурун 17 дан 22 гача, жами кунига 8-10 соат электр энергияси билан таъминланмоқда.
“Барки точик” аввалроқ электр энергияси таъминотидаги узилишлар тармоқнинг ортиқча юкламаларга умумий заифлиги билан боғлиқ эканини маълум қилган.