O‘zbekiston tashqi ishlar vaziri Baxtiyor Saidov kecha Ugandaning birinchi elchisi Mozes Kavaaluuko Kizigeni qabul qildi, deb xabar qilmoqda "Dunyo" AA.
"Ugandaning O‘zbekistondagi birinchi Elchisi Mozes Kavaaluuko Kizige janoblari Toshkentga keldi, – deb yozdi O‘zbekiston TIV rahbari o‘zining telegram-kanalida. – Biz Qo‘shilmaslik harakatiga Ugandaning muvaffaqiyatli raisligini olqishlaymiz va 2027-2029 yillarda Harakatga bo‘lajak raisligimizni qo‘llab-quvvatlashini qadrlaymiz. Tashqi ishlar vazirliklari o‘rtasida siyosiy maslahatlashuvlar yo‘lga qo‘yilishi mamlakatlarimizning manfaatli va istiqbolli hamkorligi uchun mustahkam zamin yaratadi. Tadbirkorlarning o‘zaro aloqalarini mustahkamlash, xalqaro tashkilotlar doirasidagi hamkorlik, foydalanilmagan salohiyatni ro‘yobga chiqarish va boshqa masalalar ham kun tartibimizdan o‘rin oldi".
Eslatib o‘tamiz, Uganda O‘zbekiston bilan diplomatik munosabatlar o‘rnatgan 145-davlat hisoblanadi.
Tegishli qo‘shma kommyunike 2024 yil 18 yanvar kuni Uganda poytaxti Kampala shahrida O‘zbekiston delegatsiyasining Qo‘shilmaslik harakatining vazirlar yig‘ilishida ishtiroki chog‘ida imzolangan.