Olmaota shahridan yo‘lga chiqqan Qozog‘iston va O‘zbekiston o‘rtasidagi birinchi sayyohlik poyezdi Toshkentga yetib bordi, deb xabar beradi "Dunyo" AA .
Qozog‘istonning "Kazinform" xalqaro axborot agentligining yozishicha, ilk sayyohlik poyezdi O‘zbekiston poytaxtida tantanali kutib olindi. U "Olmaota – Turkiston – Toshkent – Olmaota" yo‘nalishida yo‘lga chiqqan.
Bungacha poyezd yo‘lovchilari Turkistonda bo‘lib, Ariston bobo maqbarasi, "Hazrat Sulton" tarixiy-madaniy qo‘riq-muzeyi, Markaziy Osiyodagi eng yirik "Karvonsaroy" sayyohlik majmuasiga tashrif buyurdi.
Endi ular ikki kun davomida O‘zbekiston poytaxtining diqqatga sazovor joylari, go‘zal tabiati, tarixiy maskanlarini ziyorat qiladilar.
Yo‘lovchilarga shahar bo‘ylab harakatlanishlari uchun maxsus turistik avtobus ajratildi. Turistik poyezd sayohati 20 noyabrgacha davom etdi.
Ma’lum qilinishicha "Olmaota – Turkiston – Toshkent – Olmaota" yo‘nalishi bo‘yicha ilk tur pilot rejimida amalga oshirildi. Kelajakda u oyiga 1-2 marta amalga oshirilishi mumkin.
