Oliy sud tomonidan Navoiy viloyati hokimligi va “Berejlivost” XICHK (xususiy ishlab chiqarish korxonasi) sanitar tozalash korxonasi o‘rtasidagi bitim bekor qilindi. Bu haqda Chiqindilarni boshqarish va sirkulyar iqtisodiyotni rivojlantirish agentligi xabar qildi.
Ma’lum qilinishicha, 2019 yil 18 yanvarda Navoiy viloyati hokimligi va sanitar korxona o‘rtasida davlat-xususiy sheriklik asosida “Maishiy chiqindilarni olib chiqib ketish xizmatlarini ko‘rsatish to‘g‘risida”gi 2-sonli bitim va 1-sonli qo‘shimcha kelishuv imzolangan edi.
Sud qaroriga asosan mazkur bitim va kelishuv korxona tomonidan abonentlarga qoniqarsiz xizmat ko‘rsatilganligi sababli bekor qilindi. Ya’ni korxona 2-sonli bitim bo‘yicha Navoiy viloyatining Navoiy shahri va Karmana tumanida, 1-sonli qo‘shimcha kelishuv bo‘yicha esa viloyatning Zarafshon tumani hududida chiqindilarni olib chiqib ketish xizmatlarini ko‘rsata olmaydi.
Bundan tashqari, ayni paytda Navoiy viloyati hokimligi, Navoiy Ekologiya boshqarmasi va “Berejlivost” XICHK o‘rtasida 2021 yil 10 sentyabrda tuzilgan Tomdi, Qiziltepa va Uchquduq tumanlarida “Maishiy chiqindilarni olib chiqib ketish xizmatlarini ko‘rsatish to‘g‘risida”gi 14-son bitimni bekor qilish yuzasidan kiritilgan da’vo arizasi apellyatsiya sudi tomonidan ko‘rib chiqilmoqda.
"Shu o‘rinda boshqa sanitar tozalash korxonalariga tegishli darajada sifatli xizmat ko‘rsatishga mas’ul ekanliklarini, aks holda bitimlar qonunchilikda belgilangan tartibda bekor qilinishini eslatib o‘tamiz!
Diqqat! Agar sizda ham chiqindi xizmatlari bo‘yicha shikoyat va takliflar bo‘lsa, Ekologiya vazirligi huzuridagi Chiqindilarni boshqarish va sirkulyar iqtisodiyotni rivojlantirish agentligining 1205 qisqa raqamlariga murojaat qiling!" - deyiladi xabarda.
