Isroil bosh vaziri Binyamin Netanyaxu Ben-Gurion xalqaro aeroporti yaqiniga husiylar tomonidan yo‘llangan raketa hujumiga javoban mamlakat “ko‘p yo‘nalishli” zarbalar berishini ma’lum qildi. Bu haqda Netanyaxu videomurojaat orqali bayonot berdi.
“Biz ilgari ham harakat qilganmiz, bundan keyin ham harakat qilamiz. Bu yagona zarba emas – javobimiz ko‘p bo‘ladi”, — deydi u.
Isroil mudofaa vaziri Isroel Kac ham keskin ogohlantirdi: “Kim bizga zarba bersa, biz undan yetti baravar kuchli javob qaytaramiz”, — deya uning so‘zlarini AFP keltirgan.
NDTV ma’lumotiga ko‘ra, husiylar tomonidan Yaman hududidan uchirilgan ballistik raketa Tel-Avivdagi Ben-Gurion aeroportining 3-terminalidan atigi 75 metr uzoqlikda yerga tushgan. Portlash natijasida yerda 25 metr chuqurlikda krater paydo bo‘lgan.
Voqea ortidan bir qator xalqaro aviakompaniyalar Isroilga parvozlarni vaqtincha to‘xtatgan. Rasmiylar jabrlanganlar haqida ma’lumot bermagan.
