Ijtimoiy tarmoqlarda Buxoro va Xorazm viloyatlarini bog‘lab turuvchi yo‘lni chigirtkalar bosgani haqida xabar tarqaldi. Holat yuzasidan O‘simliklar karantini va himoyasi agentligi ma’lumot berdi.
Qayd etilishicha, xabardagi holat Buxoro viloyatining A-380 avtomobil yo‘lining 327 kilometrida bo‘lib, mazkur hududda saksovul bukri chigirtkasi to‘dasi aniqlangan.
Ma’lumotlarga ko‘ra, chigirtkalar to‘dasini o‘z vaqtida talofatlarsiz bartaraf etish maqsadida Buxoro viloyatining chigirtka va tut parvonasiga qarshi kurash xizmati A-380 avtomobil yo‘lining 327 kilometrida 2 ta otryadga bo‘lingan holda kimyoviy ishlovlarni 24/7 rejimida olib bormoqda. Chigirtkalar to‘dasi aniqlangan hududda ayni vaqtda ham qarshi kurash tadbirlari uyushqoqlik bilan amalga oshirilmoqda.
Xabarda keltirilishicha, saksovul bukri chigirtkasi qishloq xo‘jaligi ekinlariga zarar yetkazmaydi.
Buxoro viloyatining Gazli massivi, Romiton, Qorako‘l, Toyloq tumanlari alohida nazorat ostiga olingan bo‘lib, kuzatuv-monitoring ishlari ham davom etyapti, — deyiladi xabarda.
O‘simliklar karantini va himoyasi agentligi, aholi o‘rtasida ortiqcha vahima va sarosimaga sabab bo‘luvchi xabarlarni tarqatmaslikni, zararli chigirtka tarqalgan maydonlar to‘g‘risida 1288 yoki 71 202 10 00 raqamlariga murojaat qilishga chaqirdi.
