Isroil va Eron o‘rtasidagi keskinlik ortidan yuzaga kelgan havo qatnovi cheklovlari tufayli taxminan 40 mingga yaqin xorijiy sayyoh Isroilni tark eta olmayapti. Bu haqda mamlakatning “Haaretz” nashri xabar berdi.
Ma’lum qilinishicha, havo hududi yopilganidan so‘ng Isroildan chiqib ketishni istaganlar uchun yagona yo‘l sifatida dengiz orqali evakuatsiya qoldi. Tel-Aviv yaqinidagi Herzliya dengiz portida yuzlab odamlar yaxtalar yordamida Kiprning janubiy qismiga chiqish uchun muzokaralar olib bormoqda.
Hozirda kichik yaxtalar Gerzliya, Hayfa va Ashkelon portlaridan yo‘lga chiqib, har bir reysda 10 nafargacha odamni tashish imkoniga ega. Sayohat narxi bir necha yuzdan minglab yevrogacha yetishi mumkin. Bu yaxtalarni ijaraga berayotganlar, talab yuqori bo‘lgani uchun narxlarni keskin oshirmoqda.
Dengiz evakuatsiyasi ijtimoiy tarmoqlardagi guruhlar orqali tashkil etilmoqda. Qaytishni xohlayotganlar orasida nafaqat xorijlik sayyohlar, balki chet eldagi farzandlari yoniga borishni istagan isroilliklar ham bor.
Haaretz manbasining yozishicha, Isroil hukumati mahalliy aviakompaniyalarga Isroil fuqarolarini chet eldan qaytarish uchun yuborilgan samolyotlardan faqatgina keluvchilarni olib kelishga ruxsat bergan. Bu samolyotlar orqali Isroilni tark etishni istaganlar uchun imkoniyat berilmayapti.
Nashr ma’lumotiga ko‘ra, 13 iyun kuni Isroilning Eronga amalga oshirgan hujumi ortidan boshlangan siyosiy va harbiy taranglik natijasida 100-200 mingga yaqin Isroil fuqarosi xorijda qolib ketgan. Ular mamlakatga qaytish uchun hozircha rasmiy imkoniyatlarga ega emas.
