Shimoliy Atlantika alyansi — NATO bu yilgi sammit dasturini an’anaviy uch sessiyadan faqat bir sessiyaga qisqartirdi. Gap, AQSH prezidenti Donald Trampning sabrsizligi va kutilmagan harakatlaridan ehtiyot bo‘lishda. Bu haqda “The Financial Times” nashri xabar berdi.
Ma’lumotlarga ko‘ra, Gollandiyaning Gaaga shahrida bo‘lib o‘tadigan sammitda ishchi sessiya atigi 2,5 soat davom etadi. Bu qaror Trampning yig‘ilish davomida zerikib, uni erta tark etmasligi uchun qabul qilingan.
“Bu chora Tramp zerikmasin va sammitni o‘rtasida tark etmasin degan maqsadda ko‘rilgan”, — deb yozadi FT.
Eslatib o‘tamiz, joriy yilgi “G7”sammitida Tramp tadbirni muddatidan oldin tark etib, boshqa davlat rahbarlarini ijtimoiy tarmoqlarda tanqid qilgan edi. NATO rasmiylari bu safar bunday holatga yo‘l qo‘ymaslikka urinmoqda.
NATO Bosh kotibi Mark Ryutte sammitda faqat bitta muhim masalaga e’tiborni jamlash tarafdori — bu harbiy xarajatlarni 2030 yilgacha YAIMning 5 foizigacha oshirish taklifi. Hozircha bu rejalarga Ispaniya va yana bir nechta davlat qarshilik qilmoqda. Ispaniya hukumati mudofaa xarajatlarining ortishi ijtimoiy ta’minotga salbiy ta’sir ko‘rsatishidan xavotirda.
Sammit 24–26 iyun kunlari Gaagada bo‘lib o‘tadi. Tadbirda Ukraina Prezidenti Vladimir Zelenskiy ishtirok etishi ham kutilmoqda.
