Mozambikda kamida 120 nafar bola jangarilar tomonidan o‘g‘irlangan

Mozambik shimolidagi Kabo Delgado provinsiyasida “ash-Shabob” terror guruhi tomonidan kamida 120 nafar bola o‘g‘irlab ketilgan, deya xabar bergan Human Rights Watch (HRW).

 “Mozambik shimolida kamida 120 nafar bola o‘g‘irlab ketilgan, ulardan ba’zilari majburiy mehnatga jalb qilinmoqda, askar sifatida foydalanilmoqda yoki turmushga chiqarilmoqda”, — deyiladi bayonotda.

 HRW ma’lumotlariga ko‘ra, o‘g‘irlangan bolalar ko‘pincha o‘g‘irlangan mol-mulkni olib yurishga majbur bo‘ladi, ba’zilari esa jangari sifatida qurolli mojarolarga jalb qilinadi.

 Tashkilotning qayd etishicha, so‘nggi ikki oyda voyaga yetmaganlarga hujum qilish va o‘g‘irlash holatlari ko‘paygan. Shu munosabat bilan Mozambik hukumati bedarak yo‘qolgan bolalarni topish va yangi o‘g‘irlashlarning oldini olish bo‘yicha sa’y-harakatlarni kuchaytirishga chaqiriladi.

 11 iyun kuni Kabo Delgadoga tashrif buyurgan Norvegiya Qochqinlar kengashi (NRC) Bosh kotibi Yan Egeland Mozambik shimolidagi gumanitar vaziyatni “unutilgan inqiroz” deb atadi.

 "Iqlim o‘zgarishlari, zo‘ravonlikning avj olishi va ochlikning kuchayishi aholiga halokatli ta’sir ko‘rsatmoqda. 5 milliondan ortiq odam ochlikdan o‘lish xavfi ostida, 900 mingdan ortiq kishi esa zudlik bilan yordamga muhtoj bo‘lgan og‘ir ahvolda", - dedi Egeland.

 NRC ma’lumotlariga ko‘ra, mamlakatda 5 milliondan ortiq odam o‘tkir oziq-ovqat xavfsizligiga duch kelmoqda, ulardan 900 ming nafari shoshilinch oziq-ovqat yordamiga muhtoj.

2017 yildan beri Mozambik hukumati Kabo Delgado provinsiyasida qurolli guruhlarga qarshi kurash olib boradi. Ruanda, Janubiy Afrika va boshqa mintaqaviy sheriklarning yordamiga qaramay, rasmiylar vaziyatni to‘liq nazoratga ololmadi.

2020 yilda jangarilar bir qator shafqatsiz hujumlarni amalga oshirdi, ular davomida o‘nlab odamlar, jumladan, bolalar ham boshlarini kesib o‘ldirgan.

BMT ma’lumotlariga ko‘ra, mojaro 600 mingdan ortiq odamni uylarini tashlab ketishga majbur qilgan. Zo‘ravonliklar qo‘shni viloyatlarga ham tarqaldi.

 Gumanitar inqirozning qo‘shimcha omili tabiiy ofatlar oqibatlari bo‘ldi - provinsiya bir necha bor tropik siklonlarga uchragan.

 Qolaversa, vaziyat AQSHdan kelayotgan chet el yordamlarining qisqarishi bilan ham keskinlashmoqda.