Rossiya harbiylari tomonidan amalga oshirilgan navbatdagi keng ko‘lamli havo hujumlarini qaytarish vaqtida Ukraina harbiy-havo kuchlariga qarashli F-16 qiruvchi samolyoti qulab tushdi. Oqibatda uchuvchi halok bo‘ldi. Bu haqda kecha, 29 iyun, yakshanba kuni Ukraina rasmiylari xabar berdi.
Rossiya kechasi yuzlab dronlar, qanotli va ballistik raketalarni ishga solib, Ukraina hududlariga zarba berdi. Mahalliy rasmiylarning ma’lumotiga ko‘ra, hujumlar oqibatida uy-joylar va muhim infratuzilmalarga zarar yetgan, kamida 12 kishi tan jarohati olgan.
Ukraina Prezidenti Vladimir Zelenskiy Vashingtonga va G‘arbdagi ittifoqchilariga murojaat qilib, havo mudofaa tizimini mustahkamlashda yanada faolroq yordam berishni so‘radi.
“Bizga har bir F-16, har bir Patriot kerak. Rossiyaning havodan bosimi kuchaymoqda”, — deydi Zelenskiy o‘z murojaatida.
Eslatib o‘tamiz, Rossiya-Ukraina urushi 2022 yilning fevralida boshlangan bo‘lib, bu davr mobaynida Moskva ayniqsa tun va ertalabki paytlarda havo hujumlarini kuchaytirgan.
