Futbol bo‘yicha O‘zbekiston ayollar milliy terma jamoasi 23 yillik tanaffusdan so‘ng Osiyo kubogi yo‘llanmasini qo‘lga kiritdi. Bu haqda O‘zbekiston futbol assotsiatsiyasi yozmoqda.
Osiyo kubogi saralashining so‘nggi bosqichi Toshkent shahrida bo‘lib o‘tdi. Unda O‘zbekiston ayollar MTJ Shri-Lanka, Laos va Nepal ayollar MTJlariga qarshi bahs olib bordi.
O‘zbekistonliklar dastlab, joriy yilning 29 iyun kuni Shri-Lankani 10:0 hisobida mag‘lub etgan bo‘lsa, 2 iyul kuni Laosga javobsiz 7 ta gol kiritib, g‘alaba qozondi.
Saralashning hal qiluvchi o‘yini 5 iyul kuni Nepal ayollar milliy terma jamoasiga qarshi bo‘lib o‘tdi. Dramatik kechgan bahsning asosiy vaqti 3:3 hisobida yakunlandi.
Penaltilar seriyasida esa o‘zbekistonliklarning qo‘li baland keldi va Osiyo kubogiga yo‘llanmani qo‘lga kiritdi. Shu tariqa 23 yildan so‘ng O‘zbekiston ayollar milliy terma jamoasi Avstraliyada bo‘ladigan qit’a birinchiligida qatnashadigan bo‘ldi.
Ma’lumot uchun, bundan roppa-rosa 1 oy oldin, 5 iyun kuni O‘zbekiston erkaklar milliy terma jamoasi tarixda ilk bor Jahon chempionati yo‘llanmasini qo‘lga kiritgan edi.
