Футбол бўйича Ўзбекистон аёллар миллий терма жамоаси 23 йиллик танаффусдан сўнг Осиё кубоги йўлланмасини қўлга киритди. Бу ҳақда Ўзбекистон футбол ассоциацияси ёзмоқда.
Осиё кубоги саралашининг сўнгги босқичи Тошкент шаҳрида бўлиб ўтди. Унда Ўзбекистон аёллар МТЖ Шри-Ланка, Лаос ва Непал аёллар МТЖларига қарши баҳс олиб борди.
Ўзбекистонликлар дастлаб, жорий йилнинг 29 июнь куни Шри-Ланкани 10:0 ҳисобида мағлуб этган бўлса, 2 июль куни Лаосга жавобсиз 7 та гол киритиб, ғалаба қозонди.
Саралашнинг ҳал қилувчи ўйини 5 июль куни Непал аёллар миллий терма жамоасига қарши бўлиб ўтди. Драматик кечган баҳснинг асосий вақти 3:3 ҳисобида якунланди.
Пенальтилар сериясида эса ўзбекистонликларнинг қўли баланд келди ва Осиё кубогига йўлланмани қўлга киритди. Шу тариқа 23 йилдан сўнг Ўзбекистон аёллар миллий терма жамоаси Австралияда бўладиган қитъа биринчилигида қатнашадиган бўлди.
Маълумот учун, бундан роппа-роса 1 ой олдин, 5 июнь куни Ўзбекистон эркаклар миллий терма жамоаси тарихда илк бор Жаҳон чемпионати йўлланмасини қўлга киритган эди.
