Afg‘onistonda ota 6 yoshli qizini 45 yoshli erkakka turmushga berdi. Bu haqda Kabul Now nashri xabar berdi.
Nashrning yozishicha, to‘y marosimi Afg‘onistonning Hilmand viloyatida bo‘lib o‘tgan. Bo‘lajak kuyovning allaqachon ikki xotini borligiga qaramay, bolaning otasi kelishuvga rozi bo‘lgan. Bu voqea hatto “Tolibon” orasida shov-shuvga sabab bo‘lgan, ular aralashib, nikohni to‘xtatgan.
To‘y 4 iyulga belgilangan edi. “Tolibon” qizning otasini ham, unga uylanmoqchi bo‘lgan erkakni ham hibsga olgan. Hech kimga nisbatan hech qanday ayblov qo‘yilmagan, biroq mahalliy manbalarga ko‘ra, erkakka qiz to‘qqiz yoshga to‘lgunga qadar unga uylanishi taqiqlangan.
Hilmandning ayrim aholisi va shifokorlar yosh turmush qurishdan xavotir bildirib, bunday amaliyotlar, ayniqsa, qizlar uchun jiddiy psixologik, ijtimoiy va jismoniy oqibatlarga olib kelishi mumkinligidan ogohlantirmoqda.
Ularning ta’kidlashicha, erta turmush qurish nafaqat bolaning kelajagiga tahdid soladi, balki uning ruhiy salomatligi, tabiiy rivojlanishi va ta’lim olish imkoniyatlariga ham salbiy ta’sir qiladi.
“Yoshlikda turmush qurish psixologik va jismoniy qiyinchiliklarga olib kelishi va rivojlanmagan bolani tarbiyalashiga olib kelishi mumkin, bu esa katta ijtimoiy muammoga aylanadi”, degan hilmandlik Qismatulloh Zvak.
Mamlakatdagi ijtimoiy va iqtisodiy ahvolning yomonlashuvi fonida yosh bolalar nikohi ko‘paydi. BMT Ayollar tashkilotiga ko‘ra, 2021 yilda “Tolibon” hokimiyat tepasiga kelib, qizlarning o‘qishini taqiqlaganidan so‘ng Afg‘onistonda erta turmush qurish 25 foizga, voyaga yetmaganlar tug‘ishi 45 foizga oshgan.
