Kecha, 31-iyul kuni soat 16:00 da 23 yoshli S.D. tanishi bilan hordiq chiqarish uchun Mirzo Ulug‘bek tumanidagi "Yangi O‘zbekiston" bog‘ida joylashgan "Orzular sohili" dam olish maskaniga borib, cho‘kib ketdi.
Bildirilishicha, plyajdagi tashrif buyuruvchilardan biri S.D.ning suvda harakatsiz holatda, boshi suvga botgan holda turganini payqagan. Erkak uning oldiga suzib borib, qirg‘oqqa olib chiqqan.
So‘ng voqea joyiga dam olish maskanining shifokorlari chaqirilgan, biroq ko‘rsatilgan tibbiy yordamga qaramasdan, S.D. vafot etgan. Sud-tibbiyot ekspertining dastlabki xulosasiga ko‘ra, marhum o‘limiga nafas yo‘llarining suv bilan to‘silib qolishi natijasida yuzaga kelgan mexanik asfiksiya sabab bo‘lgan.
Hozirda mazkur holat yuzasidan tergovga qadar tekshiruv ishlari olib borilmoqda.
