Turkiya avgust oyida imzolagan ikki tomonlama kelishuv asosida suriyalik harbiylarni o‘qitishni boshlandi. Bu haqda Turkish Minute nashri xabar berdi.
Bildirilishicha, hozirda taxminan 300 nafar suriyalik (asosan harbiylar va politsiya xodimlari) Turkiyaning markaziy va sharqiy hududlaridagi ikki harbiy bazada tayyorgarlikdan o‘tmoqda. Qisqa muddatda 5 ming, uzoqroq muddatda esa kamida 20 ming suriyalik harbiy va politsiya kuchlarini o‘qitish rejalashtirilgan. Shu bilan birga, Turkiya armiyasi Suriyaning shimoliy Halab viloyatidan, xususan, chegaradagi Azoz va Jarablus shaharlaridan chiqib ketmoqda. Ularning o‘rniga suriyalik xavfsizlik kuchlari joylashtirilmoqda.
Turkiya Mudofaa vazirligi kelishuv doirasida harbiylar terrorizmga qarshi kurashish, kiberxavfsizlik, minalardan tozalash, harbiy muhandislik, logistika kabi ustuvor yo‘nalishlarda o‘qitilishini ma’lum qilgan. Bu esa Suriya harbiy kuchlarini ichki va tashqi tahdidlarga qarshi javob bera oladigan zamonaviy armiyaga aylantirishga yordam beradi.
Shu kunlarda Suriyaning Homs va Latokiya hududlaridagi harbiy ob’yektlarga Isroil tomonidan havo hujumlari uyushtirilgani xabar qilinmoqda. Yahudiy manbasi zarbalar Turkiya ishlab chiqargan raketalar va havo mudofaa tizimlari saqlanayotgan omborlarga qaratilganini ochiqlagan. Isroil Suriya janubini demilitarizatsiya qilishni talab qilib, xavfli tuyilgan har qanday ob’yektga zarba berishga tayyor ekanini bildirgan.
