Qirgʻizistonda 2026 yilgi Hoj kvotasi roʻyxatga olish tizimi ochilganidan soʻng bir soat ichida toʻldi. Bu haqda Qirgʻiziston musulmonlari diniy idorasi matbuot xizmati xabar berdi.
Bildirilishicha, Hoj ziyoratiga borish istagida boʻlganlardan hujjatlarni qabul qilish kecha, 23 sentyabr kuni boshlangan va kvota toʻldirilgani sababli atigi bir soatdan keyin yopilgan.
“Roʻyxatga olish varaqalari tez toʻldirilgani uchun toʻlovlarni qabul qilish toʻxtatildi. Bu kvotaning tugab boʻlganini anglatadi”,— deydi diniy tashkilot vakili Maqsad Otaboyev.
Uning aniqlik kiritishicha, joriy yilda 6000 ta oʻrin ajratilgan va 2600 kishi avvalgi kvota boʻyicha navbatlar roʻyxatida qolgani bois ular birinchi boʻlib ruxsatnoma olgan. Qolgan 3400 ta oʻrin uchun roʻyxatdan oʻtish eʼlon qilingan edi va u bir soat ichida yopildi.
