Navoiyda reklama uchun YOX xodimi kiyimidan foydalangan shaxsga chora ko‘rildi. Bu haqda viloyat YXHB xabar berdi.
Xabarga ko‘ra, fuqaro tegishli huquqi bo‘lmay turib, YOX xodimi kiyimini kiygan holda reklama uchun rol o‘ynagan. Bu harakati bilan yigit Ichki ishlar xodimi formasini kiyish tartibini buzgan va ijtimoiy tarmoqda e’tirozlarga sabab bo‘lgan.
Fuqaro topilib, uning shaxsiga aniqlik kiritilgan. Kiyimlar esa sotib olingani ma’lum bo‘lgan.
“Joriy yilning taxminan iyul avgust oylarida bir reklama g‘oyasi asosida Instagram sahifasiga video joylagan edik. Unda men yo‘l harakati xodimi formasida, yo‘l harakati xavfsizligi xizmati xodimi roli bajarganman. Buning qonunga zid ekanini bilmagan edik”, — degan yigit.
Unga Ma’muriy javobgarlik to‘g‘risidagi kodeksning tegishli moddasiga asosan BHMning 2 baravari miqdorida jarima jazosi tayinlangan.
