Ipoteka kreditlari bo‘yicha subsidiyalar uchun arizalarni qabul qilish 2 oktyabr soat 09:00 da boshlandi — belgilangan maqsadli ko‘rsatkichlar doirasida va avval beriladigan subsidiyalar haqidagi xabarnomalarning foydalanilmagan qismi hisobidan.
Bu holat 2025 yil 21 fevraldagi Prezident farmoni («Turar-joy bozori va ipoteka kreditlashini yanada rivojlantirish bo‘yicha qo‘shimcha chora-tadbirlar to‘g‘risida»)da nazarda tutilgan, deya xabar berdi Iqtisodiyot va moliya vazirligi.
Subsidiya olish uchun arizani quyidagi usullardan biri orqali topshirish mumkin: — shaxsan Davlat xizmatlari markazlariga murojaat qilish orqali; — elektron tarzda my.gov.uz portali orqali; — MyGov mobil ilovasi orqali.
Ipoteka krediti bo‘yicha subsidiya olish uchun arizachi ijtimoiy mezonlar asosidagi baholash tizimi bo‘yicha kamida 30 ball to‘plashi lozim.
Arizachi va uning yaqin qarindoshlarining (agar arizada ko‘rsatilgan bo‘lsa) o‘rtacha daromadi quyidagi chegaralarda bo‘lishi kerak:
— Qoraqalpog‘iston Respublikasi va viloyatlarda: 2,7 dan 8 MHTEKMgacha (3 431 700 so‘mdan 10 168 000 so‘mgacha);
— Toshkent shahrida: 2,7 dan 9,2 MHTEKMgacha (3 431 700 so‘mdan 11 693 200 so‘mgacha).
Shu bilan birga, arizachi va uning turmush o‘rtog‘i butun respublika hududida uy-joy mulkiga egalik qilmasligi kerak.
Alohida ijtimoiy himoyaga muhtoj shaxslar maxsus ijtimoiy mezonlar asosida baholanadi.
