Jinoyat ishlari bo‘yicha Qarshi tuman sudining sudya yordamchisi 2500 AQSH dollari miqdoridagi pulni olgan vaqtida qo‘lga olindi. Bu haqda Davlat xavfsizlik xizmati ma’lum qildi.
Qayd etilishicha, mazkur shaxs o‘z xizmat mavqeidan shaxsiy manfaat yo‘lida foydalanishga uringan. U Majburiy ijro byurosining Qashqadaryo viloyatidagi tuman bo‘limlaridan biriga joriy yil may oyida ishga kirgan fuqaroga o‘zining mansabdor tanishlari orqali yordam berganini aytgan.
Shuningdek, kelgusida uni o‘ziga ma’qul bo‘lgan tumandagi MIB bo‘limiga o‘tkazib berishini va’da qilib, buning evaziga 2500 AQSH dollari talab qilgan.
DXH hamda Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor tadbir davomida sudya yordamchisi so‘ralgan pul mablag‘ini o‘z xizmat xonasida olgan vaqtida ashyoviy dalillar bilan ushlangan.
