Forum "Markaziy Osiyo: umumiy ma'naviy-ma'rifiy meros – umumiy kelajak" xalqaro kongressi doirasida o‘tkazilmoqda.
Bu yilgi forum Markaziy Osiyo davlatlari tarixchilarining ilmiy hamkorligini yangi bosqichga olib chiqish, tarix fanining integratsiyalashuvi va umumiy ilmiy yo‘nalishlarni belgilashda muhim ahamiyat kasb etmoqda.
Tadbirda O‘zbekiston, Qozog‘iston, Qirg‘iziston, Tojikiston, Turkmaniston va Ozarbayjonning fanlar akademiyalari, tarix institutlari hamda yetakchi olimlari ishtirok etmoqda.
Forumning ochilish marosimida O‘zbekiston Fanlar akademiyasi prezidenti Shavkat Ayupov moderatorlik qildi. Shuningdek, Ozarbayjon Milliy Fanlar akademiyasi prezidenti Isa Habibbeyli, Qirg‘iziston Milliy Fanlar akademiyasi prezidenti Kanatbek Abdurahmanov, Tojikiston Fanlar akademiyasi vitse-prezidenti Muhammad Dovud Qayum Salomiyon, Qozog‘iston Milliy fanlar akademiyasi rahbarlari hamda Turkmaniston madaniyat sohasi vakillari so‘zga chiqdi.
Tabrik so‘zlarda Markaziy Osiyo xalqlarining yagona tarixiy ildizlari, ma'naviy merosi va ilm-fan an'analari haqida fikrlar bildirilib, tarix fanini yangi tahlil va hamkorlik asosida rivojlantirish zarurligi ta'kidlandi.
Forum yalpi majlis hamda ikki sho‘’ba majlisidan iborat bo‘lib, unda qator ilmiy mavzular muhokama etildi.
Birinchi – "Markaziy Osiyo moddiy madaniyati va ma'naviy merosi" sho‘’basida arxeologiya, me'moriy yodgorliklar, islom davri madaniyati, xalqlarni birlashtiruvchi ilmiy an'analar haqida ma'ruzalar tinglandi.
Ikkinchi – "Markaziy Osiyo tarixi: o‘tmishdan zamonaviylik sari" sho‘’basida tarixiy manbalarni o‘rganish, Ipak yo‘lining tsivilizatsiyalararo ahamiyati, jadidchilik harakatlari va mintaqadagi fan-ta'lim integratsiyasi kabi masalalar muhokama qilindi.
Forum doirasida ilmiy muassasalar o‘rtasida qo‘shma tadqiqotlar, arxeologik ekspeditsiyalar va tarixiy manbalarni raqamlashtirish bo‘yicha hamkorlik yo‘nalishlari belgilab olindi.
Anjumanda so‘zga chiqqan olimlar Markaziy Osiyo tarixi yagona tsivilizatsion jarayon ekanini ta'kidlab, bugungi fan oldidagi asosiy vazifa – umumiy tarixiy hujjatlar va manbalarni yangi ilmiy yondashuvlar asosida tahlil etish ekanini qayd etdilar.
Tadbirda XIX–XX asr boshlaridagi ma'rifatparvarlik harakatlari, diniy-ma'rifiy munosabatlar, fan va ta'limdagi yaqinlashuv, jahon ilm-fani bilan integratsiya masalalariga ham alohida e'tibor qaratildi.
Tarixchilar II forumi – Markaziy Osiyo mamlakatlarining ilmiy salohiyati, tarixiy tafakkuri va ma'naviy yaqinligini yana bir bor namoyon etdi.
