Olimpiada chempioni Lazizbek Mullajonov doping qoidalarini buzgani uchun 3 yilga musobaqalardan chetlatildi.
Xalqaro test agentligi (ITA) ma'lumoticha, bokschi 2025 yil 11 iyun kuni topshirgan namunasida taqiqlangan metasteron metabolit moddasi aniqlandi.
Metasteron — Jahon antidoping agentligi tomonidan taqiqlangan anabolik steroid bo'lib, mushak massasini va kuchni oshiradigan moddalar qatoriga kiradi.
Sportchi qarorga e'tiroz bildirmagani sabab, uning jazo muddati 4 yil emas, 3 yil etib belgilandi.
Mullajonovning diskvalifikatsiyasi 2025 yil 22 iyuldan 2028 yil 21 iyulgacha amal qiladi. Shuningdek, 2025 yil 11 iyundan 22 iyulgacha bo'lgan barcha natijalari bekor qilindi.
26 yoshli bokschi 2024 yilgi Olimpiadada 92 kg vaznda oltin medal, 2023 yilgi jahon chempionatida esa bronza medalni qo'lga kiritgan edi.






