O'zbekiston o'smirlar terma jamoasi Qatarda o'tayotgan 17 yoshgacha bo'lgan futbolchilar o'rtasidagi jahon chempionatining 1/8 finalida Italiyaga 2:3 hisobida yutqazdi.
Birinchi taym Italiyaning tashabbusi ostida o'tdi. 19-daqiqada Tomas Kampaniyello darvozabon Ibrahim Shokirov qaytargan to'pga birinchi bo'lib yetib keldi va darvozani ishg'ol qildi.
Ikkinchi taymda teng kurashlar kuzatildi. 56-daqiqada Amirxon Murovov burchak zarbasidan keyin hisobni tenglashtirdi.
O'yin taqdirini qisqa fursatdagi xatolar hal qildi. 68- va 70-daqiqalarda Kampaniyello va Idrissa himoyachilar xatosidan foydalanib, o'z jamoasiga g'alaba keltiruvchi gollarni urdi.
Songgi daqiqalarda Azizbek Erimbetov hisobni qisqartira oldi xolos.
Shu tariqa bosh murabbiy Islom Ismoilov shogirdlarining jahon chempionatidagi ishtiroki yakunlandi.
