Hindistonning Goa shahridagi chorak final bahslarida Nodirbek Yo‘qubboyev germaniyalik Aleksandr Donchenkoni klassik partiyalarda 1,5:0,5 hisobida yengib, yarim finalga yo‘l oldi. Javohir Sindorov esa meksikalik Xose Martinesga qarshi kechgan bahslarda klassik o‘yinlarni durang bilan yakunlab, rapid tay-brekda 3,5:2,5 hisobida g‘alaba qozondi.
Shu tariqa yarim finalda Sindorov va Yo‘qubboyev o‘zaro kuch sinashadi. Bu o‘zbek shaxmat tarixida ilk bor qayd etilayotgan hodisa – kamida bir o‘zbekistonlik shaxmatchi finalga chiqishi aniq.
FIDE Jahon kubogi amaldagi jahon chempionini aniqlamaydi, biroq musobaqadagi dastlabki uch o‘rin 2026 yilgi da’vogarlar turniriga yo‘llanma beradi. Demak, eng kamida bir o‘zbek shaxmatchisi tarixda birinchi marta ushbu nufuzli turnirda ishtirok etadi. Agar 3-o‘rin uchun bahs hisobga olinsa, har ikki shaxmatchi ham yo‘llanma olishi mumkin.
Yarim final uchrashuvlari 21–22 noyabr kunlari o‘tkaziladi. Juftliklar: — Javohir Sindorov (O‘zb.) – Nodirbek Yo‘qubboyev (O‘zb.) — Andrey Esipenko (Rus.) – Vey Li (Xitoy).
