Gazo sektorida o‘tin terishga chiqqan 8 yoshli Fadi va 10 yoshli Jumaa Isroil droni hujumi oqibatida halok bo‘ldi. CNN xabariga ko‘ra, ular nogiron otasiga yordam sifatida ertalab o‘tin izlab chiqqan, biroq qaytib kelmagan. Tez orada qo‘shnilar ularning Isroil askarlari tomonidan o‘ldirilgani haqida xabar bergan.
Bolalarning otasi Tamer Abu Assi ularni qabrdan oldin ko‘rib, jasadlari tan jarohatlaridan ayanchli holga kelganini aytib berdi.
Isroil armiyasi hujumni tan olib, bolalarni "sariq chiziqni kesib o‘tib, askarlarga bevosita tahdid solgan shubhali shaxslar" deb atadi.
Bani Suheyla shahri Isroil kuchlari nazoratidagi "sariq chiziq" yaqinida joylashgan. Hududda belgilarning yetishmasligi sababli uning aniq chegarasi falastinliklar uchun noma'lum. O‘t ochishni to‘xtatish rejimi amal qilayotgan bo‘lsa-da, aynan shu hududda ko‘plab tinch aholi vakillari o‘ldirilgani qayd etilgan.
Qurbonlar soni ortib bormoqda
Falastin Sog‘ligni saqlash vazirligi ma'lumotiga ko‘ra, Gazodagi urush boshlanganidan beri 70 mingdan ortiq odam halok bo‘lgan. Ulardan 20 ming nafari bolalar, 10 ming nafari ayollar.
Vayronalar ostidan jasadlarni qidirish davom etayotgani uchun qurbonlar soni yanada oshishi kutilmoqda — o‘t ochishni to‘xtatish rejimi boshlanganidan beri 600 dan ortiq jasad topilgan, yana 10 minggacha jasad qum ostida qolgan bo‘lishi mumkin.
Shuningdek, rejim boshlangandan buyon Isroil kuchlari tomonidan 350 dan ortiq falastinlik o‘ldirilgani aytilmoqda.
