Migratsiya agentligi Janubiy Koreyada E-7 va E-9 vizalari bilan ishlayotgan fuqarolar orasida norasmiy ishlarga o‘tib ketish holatlari ko‘payganini ma’lum qildi.
Bunday qonunbuzarliklar katta jarimalar, imtiyozlarni qaytarish va deportatsiya kabi og‘ir oqibatlarga olib kelmoqda.
Agentlikka ko‘ra, joriy yilning o‘zida 20 nafar fuqaroga uch tomonlama shartnoma talablarini buzgani uchun 660 million so‘m miqdorida jarima qo‘llangan. Deportatsiya qilingan shaxslar esa davlat tomonidan berilgan barcha imtiyozlarni to‘liq qaytarib berishi shart bo‘ladi. Shuningdek, bunday fuqarolar 1 yil davomida xorijga tashkiliy tartibda yuborilmaydi.
Agentlik quyidagilarni eslatadi: ishdan bo‘shatilgan taqdirda fuqaro 1 oy ichida ish qidiruvchi sifatida ro‘yxatdan o‘tishi, 3 oy muddatda esa yangi ish beruvchi topib, rasmiy shartnoma tuzishi shart. Aks holda katta jarima, noqonuniy maqom va deportatsiya xavfi yuzaga keladi.
Shartnomaviy tartib-qoidalarga ko‘ra, “ish joyini kelishmasdan tark etmaslik” — qat’iy talab. U buzilsa, javobgarlik muqarrar.
Shuningdek, SPAS bazasida turganlarga murojaat qilinmoqda: agar siz shartnoma olgan bo‘lsangiz, bu ish beruvchi tomonidan tanlanganigingizni anglatadi. “Sizni tanlatib beraman” deb pul talab qiluvchilar — firibgarlar. Bunday holatda 1282 raqamiga murojaat qilish tavsiya etiladi.
Maslahat va murojaatlar uchun Migratsiya agentligining Koreyadagi vakolatxonasiga murojaat qilish mumkin:
Seul shahri, Jung-gu, Jangchungdan-ro, 213, 1003.
Telefonlar: +82222851341, +82222851343, +821039871661
Email: info@migration.uz
