"Real Madrid" bosh murabbiyi Xabi Alonso hujumchi Kilian Mbappening Ispaniya Superkubogi finalida "Barselona"ga qarshi o‘yinda maydonga tushish ehtimoli haqida fikr bildirdi. Bu haqda Madrid klubi matbuot xizmati xabar berdi.
Mutaxassisning aytishicha, frantsiyalik yulduzning "El-Klasiko"da ishtirok etishi ehtimoli bor.
"Mbappe tez orada jamoa qo‘shiladi. Uning o‘ynashga tayyor yoki tayyor emasligini tibbiy shtab bilan birgalikda baholaymiz. Holati ancha yaxshilandi, mashg‘ulotlarda qatnashdi va o‘zini yaxshi his qilyapti. Uning maydonga tushish imkoniyati boshqa futbolchilarinikidan kam emas", — dedi Alonso o‘yindan keyingi matbuot anjumanida.
Ma’lumot uchun, Kilian Mbappe jarohati sabab Ispaniya Superkubogi yarim finalidagi "Atletiko"ga qarshi uchrashuvni o‘tkazib yuborgan edi. O‘sha bahsda "Real Madrid" Federiko Valverde va Rodrigoning gollari evaziga 2:1 hisobida g‘alaba qozonib, finalga yo‘l olgan. Hal qiluvchi uchrashuvda "qaymoqranglilar"ga "Barselona" raqiblik qiladi.
Ispaniya Superkubogi finali 12 yanvarga o‘tar kechasi, Toshkent vaqti bilan 00:00 da Saudiya Arabistonining Jidda shahridagi "Qirol Abdulla" stadionida bo‘lib o‘tadi.
Qayd etilishicha, Kilian Mbappe 2024 yil yozidan buyon "Qirollik klubi" sharafini himoya qilib kelmoqda. U shu paytgacha "Real" safida 83 ta uchrashuvda 73 ta gol urib, 10 ta golli uzatma amalga oshirgan. Joriy mavsumda esa barcha musobaqalarda 24 o‘yinda 29 ta gol va 5 ta assist qayd etgan.
Futbolchining madridliklar bilan amaldagi shartnomasi 2029 yil yozigacha mo‘ljallangan. Transfermarkt portaliga ko‘ra, Mbappening bozor qiymati 200 million yevroni tashkil etadi.
